پاکستان کا 120 کلومیٹر رینج کے حامل فتح میزائل کا کامیاب تجربہ

پاکستان نے پیر کے روز زمین سے زمین پر مار کرنے والے فتح میزائل کا کامیاب تجربہ کیا ہے، جس کی رینج 120 کلومیٹر ہے۔ یہ تجربہ جاری فوجی مشق "ایکس انڈس” کے تحت کیا گیا۔
آئی ایس پی آر کے مطابق، اس تجربے کا مقصد فوجی دستوں کی آپریشنل تیاری کو یقینی بنانا اور میزائل کے جدید نیویگیشن جیسے اہم تکنیکی پہلوؤں کی توثیق کرنا تھا۔

تجربے کے دوران پاک فوج کے سینئر افسران، سائنسدانوں اور انجینئرز نے شرکت کی۔ چیئرمین جوائنٹ چیفس آف سٹاف کمیٹی اور چیف آف آرمی سٹاف نے کامیاب تجربے پر مبارکباد پیش کی اور فوج کی آپریشنل تیاریوں اور تکنیکی مہارت پر مکمل اعتماد کا اظہار کیا۔

یہ تجربہ ایک ایسے وقت میں کیا گیا ہے جب انڈیا کے ساتھ تعلقات کشیدہ ہیں، خاص طور پر کشمیر کے علاقے پہلگام میں 22 اپریل کو ہونے والے حملے کے بعد، جس میں 26 سیاح مارے گئے تھے۔ انڈیا نے اس حملے کا الزام پاکستان پر عائد کرتے ہوئے سندھ طاس معاہدے کی معطلی سمیت بہت سے اقدامات کیے تھے۔

جواب میں پاکستان نے بھی فضائی حدود کی بندش اور دو طرفہ معاہدوں کی معطلی جیسے اقدامات کیے ہیں۔ پاکستان نے انڈیا کے الزامات کو مسترد کرتے ہوئے غیر جانبدار تحقیقات کی پیشکش کی ہے۔
واضح رہے کہ دو روز قبل پاکستان نے 450 کلومیٹر رینج کے حامل ابدالی میزائل کا بھی کامیاب تجربہ کیا تھا۔ یہ تجربات پاکستان کی دفاعی تیاریوں اور خطے میں طاقت کے توازن کو برقرار رکھنے کی کوششوں کا مظہر ہیں۔