امریکی خاتون نے بالوں کے ذریعے لٹک کر نیا عالمی ریکارڈ قائم کر دیا
آسٹریلیا سے تعلق رکھنے والی سابق ریکارڈ ہولڈر سوتھاکرن کا یہ ریکارڈ تقریباً ایک دہائی سے زائد عرصے تک قائم رہا۔
ریڈ ووڈ نیشنل اینڈ سٹیٹ پارکس، کیلیفورنیا میں ایک امریکی فنکارہ لیلا نون نے بالوں کے ذریعے فضا میں لٹک کر عالمی ریکارڈ توڑ دیا، جو 2011 سے قائم تھا۔ 39 سالہ نون نے قدرتی مناظر سے بھرپور مقام پر 23 منٹ 19 سیکنڈ تک بالوں سے لٹک کر آسٹریلوی سوتھاکرن سیواگناناتھرائے کا ریکارڈ توڑا۔
نون کا کہنا ہے کہ اس کارنامے کی تیاری میں دو سال لگے، جس دوران انہوں نے اپنی جسمانی برداشت اور ذہنی قوت کو مسلسل بہتر بنایا۔ ان کے مطابق، ’’میرا مقصد یہ دکھانا تھا کہ ذہن کی طاقت سے کیا کچھ ممکن ہے۔‘‘
ریکارڈ کی کوشش کیلئے منتخب مقام، ریڈ ووڈ نیشنل پارک، امریکہ کے مشہور قدرتی سیاحتی مقامات میں سے ہے، جہاں کی بلندی اور فضا نے اس مظاہرے کو مزید چیلنجنگ بنا دیا۔
نون نے ریکارڈ توڑنے کے بعد صحافیوں سے گفتگو میں بتایا کہ اس مشق میں جسم کے ہر حصے پر شدید دباؤ پڑتا ہے، خاص طور پر کھوپڑی پر، اور اس کیلئے ذہنی سکون برقرار رکھنا سب سے اہم ہوتا ہے۔ سابق ریکارڈ ہولڈر سوتھاکرن کا یہ ریکارڈ تقریباً ایک دہائی سے زائد عرصے تک قائم رہا۔
اس مظاہرے کو دیکھنے کے لیے مقامی افراد اور سیاح بڑی تعداد میں موجود تھے، جب کہ گنیز ورلڈ ریکارڈز کے نمائندوں نے بھی اس کی تصدیق کی۔ حکام کے مطابق، لیلا نون کا ریکارڈ اب باضابطہ طور پر نئے عالمی ریکارڈ کے طور پر درج کیا جائے گا۔
