ایشیائی ترقیاتی بینک نے پاکستان میں مالیاتی نظم و نسق کو بہتر بنانے اور مالیاتی استحکام کو فروغ دینے کے لیے 80 کروڑ ڈالر کے پروگرام کی منظوری دے دی ہے۔ یہ منظوری بینک کے بورڈ کی جانب سے منگل کو دی گئی۔
اے ڈی بی کی جانب سے جاری بیان کے مطابق یہ پروگرام بہتر وسائل کی وصولی اور مؤثر استعمال میں اصلاحات کے دوسرے ذیلی مرحلے کا حصہ ہے، جس میں 30 کروڑ ڈالر کا پالیسی پر مبنی قرض اور 50 کروڑ ڈالر کی پالیسی گارنٹی شامل ہے۔ گارنٹی کی بدولت پاکستان کو کمرشل بینکوں سے تقریباً ایک ارب ڈالر کی اضافی مالی معاونت حاصل ہونے کی توقع ہے۔
اے ڈی بی کی پاکستان میں کنٹری ڈائریکٹر ایما فان نے کہا کہ پاکستان نے معاشی حالات کو بہتر بنانے میں اہم پیش رفت کی ہے، اور یہ پروگرام حکومت کے پالیسی و ادارہ جاتی اصلاحات کے عزم کی حمایت کرتا ہے۔
بیان میں کہا گیا ہے کہ پروگرام کے تحت ٹیکس پالیسی، ٹیکس وصولی، اور اخراجات کے نظم و نسق میں بہتری لانے پر کام کیا جائے گا۔ اس کے علاوہ ڈیجیٹلائزیشن، سرمایہ کاری میں سہولت اور نجی شعبے کی ترقی کو بھی فروغ دیا جائے گا۔
وزیر خزانہ کے مشیر خرم شہزاد نے بھی پروگرام کی منظوری کی تصدیق کی ہے۔ انہوں نے ایکس پر کہا کہ معاشی امور ڈویژن اور وزارت خزانہ کی قیادت میں کی گئی سفارتی کوششوں نے اے ڈی بی بورڈ میں پاکستان کو حمایت دلوائی۔
