حکومت سے مذاکرات شروع نہیں ہوئے، 15 دسمبر سے پہلے بات ہو جائے تو ملک کیلئے اچھا ہے: شیر افضل مروت

پاکستان تحریک انصاف کے مرکزی رہنما اور رکن قومی اسمبلی شیر افضل مروت کا کہنا ہے کہ حکومت سے ابھی تک کوئی مذاکرات شروع نہیں ہوئے۔ شیر افضل مروت نے کہا کہ حکومت سے مذاکرات ابھی شروع نہیں ہوئے، صرف سلام کہا گیا ہے۔ انہوں نے کہا کہ اگر مذاکرات 15 دسمبر سے پہلے ہو جائیں تو یہ ملک کے لیے اچھا ہے کیونکہ ملک میں سیاسی عدم استحکام ہے۔ .پاکستان تحریک انصاف کے رہنما سے جب 15 دسمبر تک مذاکرات کی ڈیڈ لائن کے بارے میں پوچھا گیا تو انہوں نے کہا کہ پی ٹی آئی کے بانی عمران خان نے ترسیلات زر کے حوالے سے 15 دسمبر کو کال دی ہے۔ دوسری جانب قومی اسمبلی اجلاس میں نکتہ اعتراض کا اظہار کرتے ہوئے اسد قیصر نے کہا کہ اسپیکر قومی اسمبلی ایاز صادق کے گھر فاتحہ خوانی کے لیے گئے، مذاکرات کے حوالے سے اسپیکر سے کوئی بات نہیں ہوئی۔اسد قیصر نے یہ بھی وضاحت کی کہ ہم حکومت سے کوئی مذاکرات نہیں کر رہے۔ انہوں نے کہا کہ “26 نومبر کے احتجاج میں گولیاں کیوں چلائی گئیں؟ ان لوگوں نے کس قانون کے تحت نہتے شہریوں پر گولیاں چلائیں؟ ہم اس نئے قانون کو مسترد کرتے ہیں۔” یاد رہے کہ پاکستان تحریک انصاف کے بانی چیئرمین عمران خان نے حکومت سے مذاکرات نہ ہونے کی صورت میں 14 دسمبر سے ملک میں سول نافرمانی کی تحریک شروع کرنے کا اعلان کیا ہے۔