چیمپئنز ٹرافی کیلئے قومی ٹیم کا اعلان کردیا گیا

پاکستان کرکٹ بورڈ (پی سی بی) نے آئی سی سی چیمپئنز ٹرافی 2025 کے لیے 15 رکنی اسکواڈ کا اعلان کر دیا ہے۔15 رکنی اسکواڈ میں چار تبدیلیاں کی گئی ہیں جس نے آخری بار گزشتہ سال جنوبی افریقہ میں ون ڈے سیریز کھیلی تھی۔عبداللہ شفیق، محمد عرفان خان، صائم ایوب اور سفیان مقیم کی جگہ فہیم اشرف، فخرزمان، خوشدل شاہ اور سعود شکیل کو ٹیم میں شامل کیا گیا ہے۔پاکستان کے 15 رکنی اسکواڈ میں بلے باز بابر اعظم، فخر زمان، کامران غلام، سعود شکیل اور طیب طاہر شامل ہیں جبکہ آل راؤنڈر فہیم اشرف، خوشدل شاہ اور سلمان علی آغا (نائب کپتان) اسکواڈ کا حصہ ہیں۔15 رکنی اسکواڈ میں وکٹ کیپر بلے باز محمد رضوان (کپتان) اور عثمان خان بھی شامل ہیں۔بولرز میں اسپنر ابرار احمد اور فاسٹ بولرز حارث رؤف، محمد حسنین، نسیم شاہ اور شاہین شاہ آفریدی کو شامل کیا گیا ہے۔چیمپئنز ٹرافی 19 فروری سے 9 مارچ تک پاکستان میں ہوگی، پی سی بی کے پاس اسکواڈ میں تبدیلیاں کرنے کے لیے 11 فروری تک کا وقت ہے جس کے بعد آئی سی سی ایونٹ ٹیکنیکل کمیٹی کی منظوری سے صرف طبی بنیادوں پر تبدیلیوں کی اجازت ہوگی۔یہی ٹیم چیمپئنز ٹرافی سے قبل کراچی اور لاہور میں ہونے والی سہ ملکی ون ڈے سیریز میں بھی شرکت کرے گی جس میں نیوزی لینڈ اور جنوبی افریقہ شامل ہیں۔پاکستان چیمپئنز ٹرافی میں اپنا پہلا میچ 19 فروری کو نیوزی لینڈ کے خلاف کراچی میں کھیلے گا۔