یوٹیوب کا شارٹس میں گوگل لینز کا فیچر شامل کرنے کا اعلان
اس فیچر کے تحت صارفین ویڈیوز میں موجود اشیاء، مقامات اور ٹیکسٹ کی شناخت کر سکیں گے۔
یوٹیوب نے اپنی مختصر ویڈیوز کی سروس شارٹس کو مزید مؤثر اور معلوماتی بنانے کے لیے گوگل لینز کی سہولت شامل کرنے کا آغاز کر دیا ہے۔ اس نئے فیچر کی بدولت ناظرین اب ویڈیو دیکھتے ہوئے سکرین پر موجود کسی بھی چیز، مقام یا متن کے بارے میں فوری طور پر تفصیلات حاصل کر سکیں گے۔
گوگل لینز دراصل ایک بصری سرچ ٹیکنالوجی ہے جو تصویر یا ویڈیو میں موجود اشیاء کو پہچان کر ان کے بارے میں معلومات فراہم کرتی ہے۔ اب یہی ٹیکنالوجی یوٹیوب شارٹس کا حصہ بنائی جا رہی ہے، جس کا مقصد صارفین کو دیکھتے ہوئے سیکھنے اور مزید معلومات حاصل کرنے کے نئے مواقع فراہم کرنا ہے۔
یوٹیوب ایپ میں کسی بھی شارٹ ویڈیو کو پلے کرتے ہوئے، سکرین پر ٹیپ کر کے ویڈیو کو روکنے کے بعد اوپر لینز کا بٹن ظاہر ہو جائے گا۔ اس بٹن پر کلک کر کے صارفین ویڈیو میں موجود کسی جگہ یا ٹیکسٹ کے حوالے سے گوگل پر سرچ کر سکیں گے۔
یہ نیا فیچر ویڈیوز میں شامل مناظر، اشیاء یا تحریروں کے بارے میں جاننے کا ایک دلچسپ اور تیز ترین ذریعہ بنے گا۔ صارفین نہ صرف اشیاء کی شناخت کر سکیں گے بلکہ مقامات کی معلومات حاصل کرنے، غیر ملکی زبانوں کے متن کا ترجمہ کرنے اور دیگر تفصیلات بھی معلوم کر سکیں گے۔
کمپنی کے مطابق یہ فیچر ابتدائی طور پر بیٹا مرحلے میں متعارف کرایا جا رہا ہے اور آنے والے دنوں میں تمام صارفین کے لیے دستیاب ہوگا۔
یوٹیوب کا یہ قدم دیگر سوشل میڈیا پلیٹ فارمز جیسے ٹک ٹاک اور انسٹاگرام ریلز سے مقابلے کے لیے ایک بڑی پیش رفت تصور کیا جا رہا ہے۔ اس سے صارفین کو دیکھنے اور سیکھنے کا ایک نیا تجربہ حاصل ہوگا۔
