عدالت کا فیصلہ،توشہ خانہ اور دیگر مقدمات عمران خان اور بشریٰ بی بی کو ضمانت میں ریلیف مل گیا

اسلام آباد: ڈسٹرکٹ اینڈ سیشن کورٹ اسلام آباد نے پاکستان تحریک انصاف کے بانی عمران خان اور ان کی اہلیہ بشریٰ بی بی کی عبوری ضمانتوں میں توسیع کر دی ہے۔ یہ فیصلہ ایڈیشنل سیشن جج افضل مجوکا نے ضمانت قبل از گرفتاری کی درخواستوں پر سماعت کے دوران سنایا۔

عدالت میں عمران خان کی چھ اور بشریٰ بی بی کی ایک ضمانت قبل از گرفتاری کی درخواستوں پر سماعت ہوئی۔ تاہم آج بھی عمران خان کی ضمانت کی درخواستوں پر دلائل پیش نہ کیے جا سکے، جب کہ بشریٰ بی بی کی درخواست پر محفوظ کیا گیا فیصلہ بھی نہ سنایا جا سکا۔

عدالت نے عمران خان کی عدم حاضری کے باعث درخواستوں پر مزید کارروائی مؤخر کرتے ہوئے سماعت 9 ستمبر تک ملتوی کر دی۔ عمران خان کی جانب سے آج ان کے وکیل خالد یوسف چوہدری عدالت میں پیش ہوئے۔

یاد رہے کہ عدالت نے گزشتہ سماعت پر عمران خان کو عدالت میں پیش کرنے یا ویڈیو لنک کے ذریعے حاضری یقینی بنانے کا حکم دیا تھا، جو آج بھی پورا نہ ہو سکا۔

واضح رہے کہ بانی پی ٹی آئی پر احتجاج، توڑ پھوڑ اور اقدام قتل سمیت مختلف نوعیت کے پانچ مقدمات درج ہیں، جب کہ عمران خان اور ان کی اہلیہ بشریٰ بی بی کے خلاف توشہ خانہ کیس میں جعلی رسیدیں جمع کرانے کا مقدمہ بھی شامل ہے۔