قومی ہیرو ارشد ندیم برطانیہ میں تربیت کے لیے روانہ، عالمی مقابلوں کی بھرپور تیاری جاری

لاہور: پاکستان کے فخر، اولمپک ہیرو اور عالمی سطح پر جیولن تھرو میں ملک کا نام روشن کرنے والے ارشد ندیم آئندہ بین الاقوامی مقابلوں کی تیاری کے لیے برطانیہ روانہ ہو گئے ہیں۔ ان کے ہمراہ کوچ سلمان اقبال بٹ بھی موجود ہیں، جہاں وہ 11 اگست تک لندن میں خصوصی تربیتی سیشنز میں شرکت کریں گے۔

حال ہی میں ارشد ندیم نے پنڈلی میں معمولی تکلیف کے باعث پولینڈ میں ہونے والی ڈائمنڈ لیگ سے دستبرداری اختیار کی تھی، تاہم اب وہ مکمل فٹنس کے ساتھ بھرپور تیاری کے موڈ میں ہیں۔

اگلا ہدف سوئٹزرلینڈ میں شیڈول ڈائمنڈ لیگ (24 تا 29 اگست) ہے، جہاں ارشد کا مقابلہ ایک بار پھر بھارت کے عالمی شہرت یافتہ ایتھلیٹ نیرج چوپڑا سے متوقع ہے۔ شائقین ایک سنسنی خیز اور اعلیٰ معیار کے مقابلے کے منتظر ہیں۔

ارشد ندیم کے عالمی مقابلوں کا اصل سنگِ میل ٹوکیو ورلڈ ایتھلیٹکس چیمپئن شپ ہے، جو 13 سے 21 ستمبر تک منعقد ہو گی۔ پاکستانی عوام کو بھرپور امید ہے کہ ارشد ایک بار پھر قوم کا سر فخر سے بلند کریں گے۔

ارشد ندیم کی مسلسل محنت، جذبہ، اور عزم یہ ظاہر کرتا ہے کہ پاکستان نہ صرف کرکٹ بلکہ ایتھلیٹکس میں بھی عالمی سطح پر مقام حاصل کر رہا ہے۔ ان کی کامیابیاں نوجوان نسل کے لیے مشعلِ راہ اور پاکستان کے لیے اعزاز ہیں۔