لاہور (نمائندہ خصوصی) – پاکستان تحریک انصاف کے جنرل سیکریٹری سلمان اکرم راجا نے کہا ہے کہ پی ٹی آئی میں اختلافات کے تاثر کو پھیلانا ایک منظم سازش ہے، جس کے پیچھے فیصلہ ساز عناصر کارفرما ہیں۔ انہوں نے اس بیانیے کو سختی سے مسترد کرتے ہوئے کہا کہ پوری پارٹی بانی تحریک انصاف عمران خان کی رہائی کے لیے متحد ہے۔
لاہور میں ایک اہم نیوز کانفرنس سے خطاب کرتے ہوئے سلمان اکرم راجا نے کہا:
"یہ ملک اشرافیہ کے ہاتھوں یرغمال ہے۔ مگر عمران خان کی رہائی نہ صرف عدلیہ کی آزادی بلکہ پوری قوم کے شعور کی بحالی ہے۔”
انہوں نے واضح کیا کہ پی ٹی آئی نے ماضی میں صحت کارڈ جیسی فلاحی اسکیمیں متعارف کروا کر غریب عوام کی نبض پر ہاتھ رکھا، اور آج بھی پاکستان کے غریب عوام کا دل صرف عمران خان کے ساتھ دھڑکتا ہے۔
لاہور میں قیادت کا اجتماع: اتحاد کا مظاہرہ
سلمان اکرم راجا کے مطابق پارٹی قیادت کا لاہور میں اکٹھا ہونا اس بات کا ثبوت ہے کہ تحریک انصاف اپنی قیادت کی رہائی کے مطالبے پر ایک صف میں کھڑی ہے۔
"بانی ٹی آئی کی سربراہی میں ہم ملک کی تاریخ بدلنے نکلے ہیں، اور 8 فروری جیسے دنوں کو ہم کبھی فراموش نہیں ہونے دیں گے،” انہوں نے پرعزم لہجے میں کہا۔
معاشی بدعنوانی پر کڑی تنقید
کانفرنس کے دوران سلمان اکرم راجا نے چینی بحران پر بھی شدید تنقید کی، کہا:
"لاکھوں ٹن چینی بیرون ملک بھیج کر مہنگے داموں واپس منگوائی جا رہی ہے – یہ بدعنوانی کا کھلا مظہر ہے۔”
انہوں نے اعلان کیا کہ تحریک انصاف اب ہر گھر سے نکلے گی، اور قوم سے یہ وعدہ ہے کہ پی ٹی آئی اب پیچھے نہیں ہٹے گی۔
