لندن – پاکستان اور برطانیہ کے درمیان دیرینہ تعلقات کو مزید مستحکم کرنے کی جانب ایک اہم قدم، پاکستان ہائی کمیشن لندن میں ایک خصوصی اور تاریخی تقریب کا انعقاد کیا گیا، جس میں برطانیہ بھر سے 250 سے زائد پاکستانی نژاد برطانوی عوامی نمائندوں نے شرکت کی۔
یہ منفرد تقریب پاکستانی ہائی کمشنر برائے برطانیہ ڈاکٹر محمد فیصل کی دعوت پر منعقد کی گئی، جس کا مقصد برٹش پاکستانی قیادت کو ایک پلیٹ فارم پر جمع کرنا اور دونوں ممالک کے درمیان تعلقات کو نئی جہت دینا تھا۔
تقریب میں برطانیہ کے مختلف شہروں بشمول لندن، مڈلینڈز، مانچسٹر، بریڈفورڈ، برمنگھم اور گلاسگو سے منتخب میئرز، ڈپٹی میئرز، کونسلرز اور کمیونٹی نمائندوں نے شرکت کی۔
نمایاں مقررین:
ڈاکٹر محمد فیصل – پاکستانی ہائی کمشنر
لیاقت علی MBE – چیئرمین یو کے – پاکستان کشمیری کونسلرز فورم
زعفران نواز خان – شریف آف ناٹنگھم
نمایاں کونسلرز: رخسانہ فیاض، ماجد محمود، نظام اعظم، عشرت شاہ، نگہت خان، طارق ڈار و دیگر
سید قمر رضا – چیئرمین اوورسیز پاکستانی فاؤنڈیشن (او پی ایف)
اپنے خطاب میں ڈاکٹر محمد فیصل نے کہا:
"برٹش پاکستانی ہمارے ثقافتی سفیر ہیں۔ وہ برطانیہ میں جمہوریت کے استحکام، بین الثقافتی ہم آہنگی، اور پاکستان کے مثبت تشخص کو اُجاگر کرنے میں نمایاں کردار ادا کر رہے ہیں۔ پاکستان کی ترقی آپ کی ترقی سے جُڑی ہوئی ہے۔”
انہوں نے کمیونٹی رہنماؤں پر زور دیا کہ وہ تعلیم، صحت، کاروبار اور عوامی خدمات کے شعبوں میں برٹش پاکستانیوں، خصوصاً خواتین اور نوجوانوں کی کامیابیوں کو اجاگر کریں۔ انہوں نے اس بات پر بھی روشنی ڈالی کہ کمیونٹی کو بدنام کرنے والے عناصر کے خلاف اجتماعی ردعمل کی ضرورت ہے۔
تقریب کے کلیدی مقاصد:
پاکستانی نژاد عوامی نمائندوں کے مابین روابط کو مضبوط بنانا
برطانیہ میں پاکستانی کمیونٹی کی اجتماعی قیادت کو فروغ دینا
پاکستان اور برطانیہ کے درمیان دوطرفہ تعلقات کو وسعت دینا
نوجوان نسل کو پاکستان کے ثقافتی ورثے سے جوڑنا
