پاک فوج کے شعبہ تعلقاتِ عامہ (آئی ایس پی آر) کے ڈائریکٹر جنرل، لیفٹیننٹ جنرل احمد شریف چودھری ہلالِ امتیاز (ملٹری) نے مظفر آباد کا اہم دورہ کیا، جہاں انہوں نے آزاد جموں و کشمیر کی سول سوسائٹی سے خصوصی ملاقات کی۔
اس موقع پر ایک جامع سوال و جواب کی نشست کا انعقاد کیا گیا، جس میں کشمیری عوام نے بھرپور شرکت کی۔ کشمیری سول سوسائٹی نے ڈی جی آئی ایس پی آر کو خراج تحسین پیش کرتے ہوئے کہا کہ "کشمیر پاکستان کی شہ رگ تھا، ہے اور ہمیشہ رہے گا، پاکستان اور کشمیر کو دنیا کی کوئی طاقت جدا نہیں کر سکتی۔”
ملاقات کے دوران کشمیری عوام نے پاک فوج سے اپنی والہانہ محبت کا اظہار کرتے ہوئے جنرل احمد شریف چودھری کو روایتی کشمیری لباس پیش کیا۔ شرکاء نے بھارتی جارحیت کا منہ توڑ جواب دینے پر پاک فوج کی پیشہ ورانہ صلاحیتوں کو سراہا اور ان کی قربانیوں کو خراجِ عقیدت پیش کیا۔
تقریب میں شریک افراد نے پاکستان اور کشمیر کے جھنڈے لہرا کر پاکستان سے یکجہتی کا اظہار کیا اور فلک شگاف نعرے لگائے کہ "کشمیر بنے گا پاکستان” اور "کشمیری عوام کل بھی پاکستان کے ساتھ تھے، آج بھی ساتھ ہیں اور ہمیشہ رہیں گے۔”
لیفٹیننٹ جنرل احمد شریف چودھری نے کشمیری عوام کے جذبے اور محبت کو سراہتے ہوئے ان کے عزم و حوصلے کو خراجِ تحسین پیش کیا اور یقین دہانی کروائی کہ پاک فوج ہر محاذ پر کشمیری عوام کے شانہ بشانہ کھڑی ہے۔
