کراچی: پاکستان اسٹاک ایکسچینج (PSX) نے جمعہ کو زبردست تیزی کا مظاہرہ کیا، جس کے باعث کے ایس ای 100 انڈیکس نئی تاریخی بلندی پر پہنچ گیا۔ کاروباری ہفتے کے آخری دن سرمایہ کاروں کے اعتماد اور مثبت معاشی اشاریوں نے مارکیٹ کو مستحکم اور خوشگوار انداز میں بڑھنے میں مدد دی۔
مارکیٹ کا آغاز 454 پوائنٹس اضافے کے ساتھ ہوا، جس کے نتیجے میں انڈیکس 134,236 پوائنٹس پر پہنچ گیا۔ دن بھر یہ مثبت رجحان برقرار رہا اور اختتام پر انڈیکس میں مجموعی طور پر 669 پوائنٹس کا اضافہ ریکارڈ کیا گیا، جس کے بعد کے ایس ای 100 انڈیکس 134,452 پوائنٹس کی نئی بلند ترین سطح پر بند ہوا۔
یہ تیزی رواں ہفتے کے دوران مارکیٹ میں سرمایہ کاری اور اعتماد کے بڑھتے ہوئے رجحان کا تسلسل ہے۔ ہفتے کے آغاز میں بھی اسٹاک مارکیٹ نے تاریخی سطح پر پہنچ کر خوش آئند شروعات کی تھیں، جو پورے ہفتے جاری رہیں۔
تجزیہ کاروں کا کہنا ہے کہ ملکی معیشت میں بہتری، سیاسی استحکام اور سرمایہ کاروں کے بڑھتے ہوئے اعتماد نے مارکیٹ کی اس شاندار کارکردگی میں اہم کردار ادا کیا ہے۔ اس کے علاوہ حکومت کی اقتصادی پالیسیوں اور عالمی مالیاتی اداروں سے تعاون کے مثبت اشارے بھی مارکیٹ کے حوصلے بڑھانے کا باعث بنے۔
ماہرین کی پیشگوئی ہے کہ اگر موجودہ مثبت رجحان برقرار رہا تو آئندہ دنوں میں پاکستان اسٹاک ایکسچینج میں مزید تیزی دیکھنے کو مل سکتی ہے، جو ملکی معیشت کے لیے ایک خوش آئند علامت ہے۔
