پاکستان اور متحدہ عرب امارات نے پیر کو ثقافت، تجارت اور قونصلر امور میں تعاون بڑھانے کے لیے تین مفاہمتی یادداشتوں پر دستخط کیے، جن کا مقصد دو طرفہ اقتصادی اور سفارتی روابط کو وسعت دینا ہے۔
معاہدوں پر دستخط وزارت خارجہ اسلام آباد میں نائب وزیر اعظم و وزیر خارجہ اسحاق ڈار اور یو اے ای کے نائب وزیر اعظم و وزیر خارجہ شیخ عبداللہ بن زاید النہیان کی ملاقات کے دوران کیے گئے۔ ان میں ایک یادداشت ثقافتی تعاون، جبکہ دوسری قونصلر امور پر مشترکہ کمیٹی کے قیام سے متعلق ہے۔
دونوں رہنماؤں نے فیڈریشن آف یو اے ای چیمبرز آف کامرس اینڈ انڈسٹری اور فیڈریشن آف پاکستان چیمبرز آف کامرس اینڈ انڈسٹری کے درمیان مفاہمتی یادداشت کے تبادلے کی تقریب میں بھی شرکت کی، جس کے تحت یو اے ای-پاکستان جوائنٹ بزنس کونسل قائم کی جائے گی۔ اس کونسل کا مقصد تجارتی روابط اور سرمایہ کاری میں اضافہ کرنا ہے۔
یادداشت کا تبادلہ یو اے ای کے اسسٹنٹ وزیر برائے اقتصادی و تجارتی امور سعید مبارک الحجری اور ایف پی سی سی آئی کے صدر عاطف اکرام شیخ نے کیا۔
سرکاری اعلامیے کے مطابق، اسحاق ڈار نے کہا کہ پاکستان اور یو اے ای کے تعلقات باہمی اعتماد اور مشترکہ مفادات پر مبنی ہیں، اور دونوں ممالک اقتصادی ترقی کے لیے مل کر کام کر رہے ہیں۔ شیخ عبداللہ بن زاید نے پاکستان کی میزبانی کو سراہتے ہوئے تعلقات کو مزید مضبوط بنانے کے عزم کا اظہار کیا۔
