وزیر اعظم شہباز شریف نے وفاقی حکومت کے زیر انتظام صحت کے نظام کو جدید خطوط پر استوار کرنے کی ہدایت کی۔شہباز شریف کی زیر صدارت وزارت قومی صحت کے امور سے متعلق جائزہ اجلاس ہوا جس میں انہوں نے صحت کی سہولیات کے حوالے سے اسلام آباد کو پورے ملک کے لیے ماڈل بنانے کی ہدایت کی۔وزیراعظم نے کہا ہے کہ حکومت صحت کی سہولیات تک رسائی کے لیے ترجیحی بنیادوں پر کام کر رہی ہے۔ملاقات کے دوران انہوں نے جناح میڈیکل کمپلیکس اینڈ ریسرچ سینٹر کے کام کی رفتار تیز کرنے اور کمپلیکس کے لیے مشینری اور آلات کی خریداری کے لیے پری کوالیفکیشن کا عمل شروع کرنے کی ہدایت کی۔شہباز شریف نے ہدایت کی ہے کہ پری کوالیفکیشن کا عمل ماہر کنسلٹنٹ کی نگرانی میں مکمل کیا جائے، جناح میڈیکل کمپلیکس کے تعمیراتی کام اور مشینری اور آلات کی خریداری کا تیسرے فریق سے آڈٹ کرایا جائے۔
