وزیراعظم شہباز شریف کا کہنا ہے کہ حج 2025 کی تیاری میں کسی قسم کی لاپرواہی قابل قبول نہیں۔وزیراعظم کی زیر صدارت حج 2025 کی تیاریوں کے حوالے سے جائزہ اجلاس ہوا۔ملاقات میں گفتگو کرتے ہوئے انہوں نے کہا کہ حج 2025 میں عازمین کے لیے ہر قسم کی معاونت اور سہولیات کو یقینی بنایا جائے، حج کی تیاریوں کے حوالے سے جامع بریفنگ تیار کر کے آئندہ چند روز میں پیش کی جائے۔شہباز شریف نے حج معاونین کے انتخاب کے طریقہ کار، ذمہ داریوں اور دیگر انتظامات پر بریفنگ طلب کی۔وزیراعظم کا کہنا ہے کہ عازمین کو حج 2025 سے متعلق بہترین تربیتی سہولیات فراہم کی جائیں۔انہوں نے حج ڈیوٹی پر اچھی شہرت کے حامل افسران کو تعینات کرنے کی ہدایت کرتے ہوئے کہا کہ معاونین کے انتخاب کے عمل میں شفافیت اور میرٹ کو مدنظر رکھا جائے۔
