38

عالمی برادری افغان معیشت میں کیش انجیکٹ کرے، سیکرٹری جنرل اقوام متحدہ

اقوام متحدہ کے سیکرٹری جنرل انتونیو گتریس کا کہنا ہے کہ عالمی برادری افغان معیشت میں کیش انجیکٹ کرے۔

تفصیلات کے مطابق اقوام متحدہ کے سیکرٹری جنرل انتونیو گتریس نے اپنے بیان میں کہا ہے کہ افغانستان کے دیگر ممالک میں اثاثے منجمد ہیں اور ترقیاتی امداد روک دی گئی ہے۔

انتونیو گتریس نے کہا کہ عالمی برادری سے اپیل کرتا ہوں افغان معیشت میں کیش انجیکٹ کرے تاکہ سب کچھ تباہی سے بچ سکے۔

اقوام متحدہ کے سیکرٹری جنرل کا کہنا ہے کہ ایسا راستہ تلاش کرنا ہوگا کہ افغان معیشت دوبارہ سانس لے سکے لیکن سب کچھ عالمی قوانین اور قواعد و ضوابط کو نظرانداز کیے بغیر ہونا چاہیے۔

انہوں نے کہا ہے کہ طالبان نے افغان خواتین اور لڑکیوں سے کیے جانے والے وعدے توڑ دیئے ہیں، انہوں نے کہا کہ وعدے ٹوٹنے کا مطلب افغانستان کی خواتین اور لڑکیوں کے لیے خوابوں کا ٹوٹنا ہے۔

انتونیو گتریس نے کہا کہ طالبان سے اپیل کرتا ہوں کہ وہ خواتین اور لڑکیوں سے کیے جانے والے اپنے وعدوں پر قائم رہیں، طالبان بین الاقوامی انسانی حقوق اور ہیومنٹیرین قوانین کے مطابق بھی اپنی ذمہ داریاں پوری کریں۔

اقوام متحدہ کے سیکرٹری جنرل انتونیو گتریس نے خبردار کرتے ہوئے کہا کہ اقوام متحدہ اس مسئلے پر آرام سے نہیں بیٹھے گا۔ ان کا کہنا تھا کہ اقوام متحدہ کی طالبان سے روزانہ کی بنیادوں پر بات ہوتی ہے۔

اس خبر پر اپنی رائے کا اظہار کریں

اپنا تبصرہ بھیجیں