ڈکی بھائی کے خلاف تحقیقات میں بڑا مالی انکشاف، کروڑوں روپے حکومت کی تحویل میں

ویب ڈیسک –
سینئر صحافی جاوید چوہدری نے اپنے حالیہ پوڈکاسٹ میں معروف یوٹیوبر سعد الرحمان عرف ڈکی بھائی سے متعلق اہم انکشافات کیے ہیں، جنہوں نے سوشل میڈیا پر غیر رجسٹرڈ جوئے کی ایپس کی مبینہ تشہیر کے ذریعے کمائی کی رقم چھپائی ہوئی تھی۔

جاوید چوہدری کے مطابق، تفتیشی اداروں کی تحقیقات کے دوران یہ بات سامنے آئی کہ ڈکی بھائی کے دبئی میں موجود اکاؤنٹس میں 6 لاکھ درہم پائے گئے، جنہیں حکام نے منجمد کر کے قبضے میں لے لیا۔ مزید برآں، ان کے پاکستان میں موجود بینک اکاؤنٹس سے 15 کروڑ روپے اور ڈیجیٹل والیٹس سے 3 لاکھ 25 ہزار روپے بھی برآمد ہوئے، جو اب حکومت پاکستان کی تحویل میں ہیں۔

این سی سی آئی اے کی کارروائی

نیشنل سائبر کرائم انویسٹی گیشن اتھارٹی (NCCIA) کے مطابق یہ ساری رقم سرکاری اکاؤنٹس میں منتقل کر دی گئی ہے۔ تفتیش کے دوران کئی دیگر شخصیات کے خلاف بھی کارروائی کی جا رہی ہے جن میں محمد حسین، اقرا کنول اور مدثر حسین کے نام سامنے آئے ہیں۔

ادارے کے ایڈیشنل ڈائریکٹر محمد سرفراز چوہدری کا کہنا ہے کہ صرف ڈکی بھائی یا رجب بٹ ہی نہیں بلکہ متعدد سوشل میڈیا شخصیات زیرِ تفتیش ہیں، اور جلد مزید انکشافات متوقع ہیں۔

تشہیر کے ذریعے مالی نقصان

این سی سی آئی اے کے مطابق، ڈکی بھائی نے یوٹیوب اور دیگر سوشل میڈیا پلیٹ فارمز کے ذریعے غیر رجسٹرڈ جوا ایپس کی تشہیر کی، جس کے باعث عوام کو مالی نقصان کا سامنا کرنا پڑا۔ تفتیشی ذرائع کے مطابق ملزم کے موبائل فون سے واٹس ایپ چیٹس، مالی لین دین کے شواہد اور دیگر ڈیجیٹل ثبوت برآمد ہوئے ہیں، جو ان کے ان ایپس سے روابط کو ظاہر کرتے ہیں۔

جسمانی ریمانڈ پر

ڈکی بھائی اس وقت جسمانی ریمانڈ پر ہیں اور تحقیقات جاری ہیں۔ حکام کا کہنا ہے کہ یہ معاملہ صرف ایک فرد تک محدود نہیں بلکہ ڈیجیٹل میڈیا پر اشتہاری اخلاقیات اور قوانین کی خلاف ورزی کے خلاف وسیع کریک ڈاؤن کا حصہ ہے۔