پاکستان میں حاملہ خواتین کی شرح اموات اسلامی دنیا میں سب سے زیادہ، پاپولیشن کونسل کی رپورٹ

اسلام آباد: پاپولیشن کونسل نے کہا ہے کہ پاکستان میں حاملہ خواتین کی شرح اموات سعودی عرب، کویت، انڈونیشیا، ملائیشیا اور دیگر اسلامی ممالک کے مقابلے میں سب سے زیادہ ہے۔

یہ بات اسلامی نظریاتی کونسل اور پاپولیشن کونسل کے اشتراک سے وسائل و آبادی میں توازن کے موضوع پر منعقدہ مشاورتی اجلاس میں سامنے آئی۔ اجلاس میں بتایا گیا کہ پاکستان میں ہر سال تقریباً 11 ہزار خواتین حمل و زچگی کی پیچیدگیوں کی وجہ سے اپنی جان سے ہاتھ دھو بیٹھتی ہیں۔

پاپولیشن کونسل نے مزید بتایا کہ پاکستان میں 1000 میں سے 62 بچے ایک سال کی عمر سے پہلے ہی دنیا چھوڑ جاتے ہیں، جبکہ پانچ سال سے کم عمر 40 فیصد بچے قد و قامت میں مناسب پیمانے پر نہیں پہنچ پاتے۔ 18 فیصد بچے غذائی قلت اور 29 فیصد وزن کی کمی کا شکار ہیں۔ علاوہ ازیں، ہر تیسرا بچہ اسکول سے باہر ہے۔

کونسل نے علمائے کرام سے درخواست کی ہے کہ قرآن و سنت کی روشنی میں عوام میں آگاہی مہم چلائی جائے کہ مائیں اپنے بچوں کو کم از کم دو سال تک دودھ پلائیں اور بچوں کی پیدائش کے درمیان مناسب وقفہ رکھیں، کیونکہ وقفہ نہ صرف ماں کی صحت کے لیے مفید ہے بلکہ نومولود بچوں کی اموات کی شرح میں بھی کمی کا باعث بنتا ہے۔

پاپولیشن کونسل نے حکومت سے بھی مطالبہ کیا ہے کہ صحت اور تعلیم کے شعبے میں فوری اقدامات کیے جائیں تاکہ پاکستان میں خواتین اور بچوں کی صحت کے مسائل کو بہتر طور پر حل کیا جا سکے۔