اسلام آباد (رپورٹ:
محکمہ موسمیات اور نیشنل ڈیزاسٹر منیجمنٹ اتھارٹی (این ڈی ایم اے) نے ملک کے مختلف علاقوں میں آئندہ چند روز کے دوران گرج چمک کے ساتھ موسلا دھار بارشوں اور بعض مقامات پر لینڈ سلائیڈنگ کا خدشہ ظاہر کیا ہے۔ شہریوں کو احتیاطی تدابیر اختیار کرنے کی ہدایت کی گئی ہے۔
محکمہ موسمیات کے مطابق اسلام آباد اور راولپنڈی میں آج سے 2 ستمبر کے دوران شدید بارشیں متوقع ہیں۔
پنجاب میں بارشوں کا نیا سلسلہ
وسطی و جنوبی پنجاب میں 29 سے 31 اگست کے دوران بارشوں کا امکان ہے۔ متاثرہ اضلاع میں ملتان، ڈی جی خان، راجن پور، لیہ، بھکر، ساہیوال، بہاولپور، بہاولنگر اور رحیم یار خان شامل ہیں۔
شمالی و شمال مشرقی پنجاب میں 30 اور 31 اگست کو شدید بارشوں کی پیشگوئی کی گئی ہے۔ اس دوران اٹک، جہلم، چکوال، لاہور، گوجرانوالہ، سیالکوٹ، گجرات، نارووال، حافظ آباد اور منڈی بہاؤالدین میں موسلا دھار بارشیں ہو سکتی ہیں۔
خیبرپختونخوا میں لینڈ سلائیڈنگ کا خطرہ
خیبرپختونخوا کے متعدد اضلاع میں آج سے 31 اگست تک بارشوں کا سلسلہ جاری رہنے کا امکان ہے۔ خاص طور پر ملاکنڈ اور ہزارہ ڈویژن میں لینڈ سلائیڈنگ کا خدشہ ظاہر کیا گیا ہے۔ متاثرہ اضلاع میں چترال، دیر، سوات، بونیر، مانسہرہ، ایبٹ آباد، پشاور، نوشہرہ، مردان، ڈی آئی خان، ٹانک، کوہاٹ اور بنوں شامل ہیں۔
آزاد کشمیر اور گلگت بلتستان
آزاد کشمیر کے علاقوں مظفرآباد، باغ، حویلی، کوٹلی، میرپور اور بھمبر میں بھی آج سے 2 ستمبر تک شدید بارشوں کی پیشگوئی کی گئی ہے۔
اسی طرح گلگت بلتستان میں بارشوں کے ساتھ لینڈ سلائیڈنگ کا خدشہ بھی ظاہر کیا گیا ہے۔
سندھ میں اربن فلڈنگ کا الرٹ
این ڈی ایم اے کے مطابق کراچی سمیت سندھ کے دیگر علاقوں میں 30 اگست سے 2 ستمبر کے دوران موسلادھار بارشوں کا امکان ہے، جس کے باعث نشیبی علاقوں میں اربن فلڈنگ کا خطرہ ہے۔
ٹھٹہ، سجاول، بدین اور تھرپارکر میں 2 ستمبر تک بارشیں متوقع ہیں، جبکہ حیدرآباد، دادو، سکھر، گھوٹکی، لاڑکانہ، جیکب آباد اور کشمور میں 30 اگست سے یکم ستمبر تک بارشوں کی پیشگوئی کی گئی ہے۔
شہریوں کے لیے ہدایات
محکمہ موسمیات اور این ڈی ایم اے نے شہریوں کو ہدایت کی ہے کہ وہ غیر ضروری سفر سے گریز کریں، ندی نالوں کے قریب نہ جائیں اور موسم کی تازہ ترین صورتحال پر نظر رکھیں۔
