نارووال: وزیراعظم شہباز شریف نے کہا ہے کہ سیلابی صورتحال سے نمٹنے کے لیے قلیل، درمیانی اور طویل المدتی پالیسیاں بنانا وقت کی اہم ضرورت ہے۔ پانی ذخیرہ کرنے کی صلاحیت میں اضافہ کیے بغیر پاکستان قدرتی آفات سے محفوظ نہیں رہ سکتا۔
انہوں نے نارووال میں سیلاب زدہ علاقوں کا دورہ کرتے ہوئے بریفنگ کے دوران بتایا کہ پاکستان موسمیاتی تبدیلی کے باعث سب سے زیادہ متاثر ہونے والے 10 ممالک میں شامل ہے اور اس چیلنج سے نمٹنے کے لیے وفاق، صوبے اور تمام متعلقہ اداروں کو مل کر کام کرنا ہوگا۔
وزیراعظم نے کہا کہ پیشگی اطلاعات کے نظام کی وجہ سے نقصان کو کم سے کم کیا جا سکا ہے اور اگر ہم فوری طور پر ڈیموں اور چھوٹے ذخائر کی تعمیر پر توجہ دیں تو مستقبل میں نقصانات کو روکا جا سکتا ہے۔
این ڈی ایم اے کی بریفنگ: دریاؤں میں طغیانی
چیئرمین این ڈی ایم اے لیفٹیننٹ جنرل انعام حیدر نے بتایا کہ بھارت کے زیر انتظام جموں و کشمیر اور سیالکوٹ ریجن میں غیر معمولی بارشوں کے باعث دریاؤں میں طغیانی آئی ہے۔ خانکی اور قادرآباد میں 10 لاکھ کیوسک پانی کا ریلہ موجود ہے جبکہ ہیڈ گنڈا سنگھ والا پر پانی کا بہاؤ مزید بڑھ چکا ہے۔
وزیراعلیٰ پنجاب مریم نواز کا بیان
وزیراعلیٰ پنجاب مریم نواز نے کہا کہ نارووال سب سے زیادہ متاثرہ ضلع ہے جہاں غیر معمولی بارشوں اور بھارت کی جانب سے پانی چھوڑنے سے صورتحال بگڑی، تاہم پیشگی اطلاعات کے نظام کی وجہ سے لوگوں کا محفوظ انخلا ممکن ہوا ہے۔ متاثرین کی مدد کے لیے تمام ادارے متحرک ہیں اور ایک ہزار فیلڈ کلینک قائم کیے گئے ہیں۔ مویشیوں کے لیے چارہ اور پانی کا بھی انتظام کیا جا رہا ہے۔
وفاقی وزیر منصوبہ بندی کا مطالبہ
وفاقی وزیر منصوبہ بندی پروفیسر احسن اقبال نے نارووال کو آفت زدہ قرار دینے کی سفارش کرتے ہوئے کہا کہ ریلیف اور ریسکیو کی کوششیں تیز کی جائیں اور بنیادی ڈھانچے کو مضبوط بنایا جائے۔
ریسکیو اور ریلیف آپریشنز کی تعریف
وزیراعظم نے متاثرین کی مدد کرنے والے تمام اداروں، افواج پاکستان اور سول انتظامیہ کی کارکردگی کو سراہا اور اعلان کیا کہ تباہ شدہ فصلوں اور گھروں کے نقصانات کا معاوضہ دیا جائے گا۔
دورہ اور فضائی جائزہ
قبل ازیں وزیراعظم شہباز شریف وزیر اعلیٰ پنجاب مریم نواز کے ہمراہ صوبے کے سیلاب سے متاثرہ علاقوں کے دورے پر پہنچے۔ روانگی سے قبل اور فضائی جائزہ کے دوران انہیں چیئرمین این ڈی ایم اے لیفٹیننٹ جنرل انعام حیدر نے تفصیلی بریفنگ دی جس میں دریاؤں کی صورتحال، زیرِآب علاقے اور جاری ریسکیو و ریلیف آپریشنز سے آگاہ کیا گیا۔
فضائی جائزے کے دوران وزیراعظم نے متعلقہ اداروں کو ہدایت کی کہ سیلابی صورتحال سے نمٹنے کے لیے تمام ضروری اقدامات فوری طور پر کیے جائیں۔ وزیراعلیٰ پنجاب مریم نواز شریف بھی وزیراعظم کے ہمراہ لاہور سے نارووال روانہ ہوئیں جہاں انہیں متاثرہ علاقوں اور امدادی سرگرمیوں پر تفصیلی بریفنگ دی گئی۔
