لاہور (اسٹاف رپورٹر):
پنجاب میں ممکنہ شدید سیلابی صورتحال کے پیش نظر محکمہ داخلہ پنجاب نے اہم قدم اٹھاتے ہوئے صوبے کے سات اضلاع میں فوج کی تعیناتی کے لیے وفاقی وزارت داخلہ کو باضابطہ مراسلہ ارسال کر دیا ہے۔
ذرائع کے مطابق لاہور، قصور، سیالکوٹ، سرگودھا، فیصل آباد، نارووال اور اوکاڑہ میں فوج کو سول انتظامیہ کی معاونت کے لیے طلب کر لیا گیا ہے۔ اس اقدام کا مقصد متاثرہ علاقوں میں انسانی جانوں کا تحفظ، بروقت امدادی کارروائیاں اور ممکنہ انخلا کو یقینی بنانا ہے۔
محکمہ داخلہ کے بیان کے مطابق، متعلقہ اضلاع میں ریسکیو 1122، سول ڈیفنس اور پولیس پہلے ہی الرٹ اور متحرک ہیں جبکہ فوجی دستوں کی تعداد ضلعی انتظامیہ کی مشاورت سے طے کی جائے گی۔ مراسلے میں مزید کہا گیا ہے کہ ضرورت کے مطابق آرمی ایوی ایشن، کشتیاں اور دیگر ضروری وسائل بھی فراہم کیے جائیں گے۔
حکام کا کہنا ہے کہ سیلابی خطرات کے پیش نظر سول اور فوجی ادارے ریسکیو آپریشنز کو مؤثر بنانے کے لیے مشترکہ طور پر کام کریں گے۔ اس سلسلے میں عوام سے بھی اپیل کی گئی ہے کہ وہ انتظامیہ کی جانب سے جاری کردہ ہدایات پر مکمل عمل کریں اور امدادی اداروں سے بھرپور تعاون کریں۔
حکومت پنجاب کی جانب سے اس اقدام کو ایک پیشگی اور سنجیدہ حکمت عملی قرار دیا جا رہا ہے تاکہ کسی بھی ممکنہ ہنگامی صورتحال سے بروقت اور مؤثر انداز میں نمٹا جا سکے۔
