اسلام آباد (20 اگست 2025) – پاکستان تحریک انصاف کے بانی اور سابق وزیراعظم عمران خان نے قوم، پارٹی کارکنان اور قیادت کے نام پیغام میں کہا ہے کہ وہ جیل میں قید ہونے کے باوجود اپنی سیاسی جدوجہد سے پیچھے نہیں ہٹے، اور ان کا عزم پہلے سے کہیں زیادہ مضبوط ہے۔
مائیکرو بلاگنگ ویب سائٹ "ایکس” پر جاری بیان میں عمران خان نے کہا:
"میرا اپنی پوری قوم، اپنے کارکنان اور پارٹی قیادت کو پیغام ہے کہ آپ کا کپتان آج بھی سینہ تان کر کھڑا ہے، آپ نے گھبرانا نہیں ہے۔”
کارکنوں کو خراجِ تحسین
عمران خان نے 5 اگست کے بعد اور 14 اگست کو ملک گیر احتجاجی سرگرمیوں میں شرکت کرنے والے تحریک انصاف کے کارکنان اور رہنماؤں کو خراج تحسین پیش کیا۔ ان کا کہنا تھا کہ:
"حالیہ احتجاجی تحریک کے نتیجے میں گرفتاریاں ہوں یا 9 مئی کے فالس فلیگ کے بعد کینگرو کورٹس کی غیر منصفانہ سزائیں، یہ سب فسطائیت کی علامت ہیں۔”
’’ظلم کے طوفان کے سامنے ڈٹ جانا ہے‘‘
انہوں نے کہا کہ ایسے حالات میں بھی پارٹی کارکنوں نے حوصلہ نہیں ہارا، اور ظلم و بربریت کے اس طوفان کے سامنے ڈٹ کر کھڑے رہے۔ عمران خان نے اس عزم کا اعادہ کیا کہ وہ خود بھی جیل کی کال کوٹھڑی سے اپنی "قوم کی حقیقی آزادی” کی جنگ لڑ رہے ہیں۔
"جب تک اپنی قوم کو غلامی کی زنجیروں سے آزاد نہیں کروا لیتا، اسی طرح ڈٹ کر کھڑا رہوں گا۔” – عمران خان
پس منظر
یاد رہے کہ عمران خان متعدد مقدمات میں سزا یافتہ ہونے کے باعث جیل میں قید ہیں۔ ان کی جماعت تحریک انصاف حالیہ ہفتوں میں دوبارہ احتجاجی سرگرمیوں میں متحرک ہوئی ہے، جس کے نتیجے میں متعدد کارکنان کو گرفتار بھی کیا گیا ہے۔
