پشاور: خیبر پختونخوا حکومت نے عوامی تحفظ کو مدنظر رکھتے ہوئے سوات اور مالاکنڈ میں تمام سرکاری و نجی اسکولز ایک ہفتے کے لیے بند رکھنے کا فیصلہ کیا ہے۔ انتظامیہ کی جانب سے اس حوالے سے باقاعدہ نوٹیفکیشن جاری کر دیا گیا ہے۔
فیصلے کے مطابق یہ اقدام حالیہ شدید بارشوں، ممکنہ سیلاب اور لینڈ سلائیڈنگ کے پیشِ نظر احتیاطی تدابیر کے طور پر کیا گیا ہے تاکہ طلبہ، اساتذہ اور عملے کی جانوں کا تحفظ یقینی بنایا جا سکے۔
تمام متاثرہ تعلیمی ادارے 25 اگست تک بند رہیں گے، جبکہ صورتحال کا مسلسل جائزہ لیا جا رہا ہے تاکہ حالات بہتر ہوتے ہی تعلیمی سرگرمیاں بحال کی جا سکیں۔
انتظامیہ نے عوام سے اپیل کی ہے کہ وہ موسمی حالات میں غیر ضروری نقل و حرکت سے گریز کریں اور مقامی اداروں کی ہدایات پر عمل کریں۔
واضح رہے کہ حالیہ مون سون بارشوں نے خیبر پختونخوا کو شدید متاثر کیا ہے، جہاں مختلف حادثات میں 373 قیمتی جانیں ضائع ہو چکی ہیں اور متعدد افراد کی تلاش اب بھی جاری ہے۔ ریسکیو ادارے امدادی سرگرمیوں میں مصروف ہیں۔
حکومت خیبر پختونخوا کی جانب سے اسکولز کی بندش کا فیصلہ احتیاط، حفاظت اور ذمہ داری کا مظہر قرار دیا جا رہا ہے، تاکہ آئندہ کسی بڑے نقصان سے بچا جا سکے۔
