اسلام آباد (نمائندہ خصوصی)
حکومت پاکستان نے ملک میں مقیم افغان شہریوں کے انخلا کے لیے 1 ستمبر 2025 کی حتمی تاریخ مقرر کر دی ہے، اور اب اس ڈیڈ لائن میں صرف 15 دن باقی رہ گئے ہیں۔ اس فیصلے کے تحت وہ افغان باشندے بھی وطن واپسی کے پابند ہوں گے جن کے پاس پی او آر (Proof of Registration) یا افغان سٹیزن کارڈ موجود ہیں۔
سرکاری حکام کے مطابق یہ اقدام ملک میں غیر قانونی طور پر مقیم افراد کی تعداد پر قابو پانے، سیکیورٹی خدشات کو کم کرنے اور باقاعدہ رجسٹریشن کے حامل افراد کو الگ شناخت دینے کے لیے کیا گیا ہے۔
حکام کا کہنا ہے کہ پاکستان میں موجود تمام غیر قانونی افغان شہری، حتیٰ کہ وہ افراد بھی جن کے پاس عارضی قانونی حیثیت کی دستاویزات موجود ہیں، انہیں رضاکارانہ طور پر ملک چھوڑنا ہوگا۔ حکومت کی جانب سے واضح کیا گیا ہے کہ ڈیڈ لائن کے بعد سخت قانونی کارروائی عمل میں لائی جائے گی۔
باعزت واپسی کی یقین دہانی
وفاقی وزارت داخلہ اور دیگر متعلقہ اداروں نے انخلا کے عمل کو باعزت، محفوظ اور انسانی بنیادوں پر مکمل کرنے کی یقین دہانی کرائی ہے۔ واپسی کرنے والے افغان باشندوں کو خوراک، طبی سہولیات اور بنیادی امداد فراہم کرنے کے انتظامات مکمل کر لیے گئے ہیں۔
حکام نے زور دیا ہے کہ انخلا کے عمل کے دوران زبردستی یا بدسلوکی سے گریز کیا جائے گا، اور واپسی کا پورا عمل مکمل طور پر رضاکارانہ ہوگا۔
سیکیورٹی اور وسائل پر بوجھ
یاد رہے کہ حکومت پاکستان کا یہ فیصلہ ایک ایسے وقت میں سامنے آیا ہے جب ملک میں غیر قانونی طور پر مقیم افراد کی وجہ سے سیکیورٹی خطرات، معاشی دباؤ اور وسائل کی کمی جیسے سنگین مسائل کا سامنا ہے۔ حکام کا کہنا ہے کہ اس پالیسی کا مقصد ملکی سلامتی، وسائل کی منصفانہ تقسیم اور پناہ گزینوں کے بہتر نظم و نسق کو یقینی بنانا ہے۔
افغان باشندوں سے اپیل
حکومت نے افغان مہاجرین سے اپیل کی ہے کہ وہ مقررہ وقت کے اندر اپنے انخلا کے انتظامات مکمل کریں تاکہ کسی بھی ناخوشگوار صورتحال سے بچا جا سکے۔
