اسلام آباد
پاکستان کے 78ویں یومِ آزادی کے موقع پر ملک کی اعلیٰ سیاسی، عدالتی اور حکومتی قیادت نے قوم کو دل کی گہرائیوں سے مبارکباد پیش کی ہے، اور وطن عزیز کے تحفظ، ترقی اور جمہوریت کے استحکام کے لیے اپنے عزم کا اعادہ کیا ہے۔
رواں سال کی تقریبات کو ‘معرکۂ حق’ اور ‘آپریشن بنیان مرصوص’ کی تاریخی کامیابی سے منسوب کیا گیا ہے، جس نے قوم کی خوشیوں کو مزید بڑھا دیا ہے۔
چیف جسٹس آف پاکستان کا پیغام: انصاف پر مبنی معاشرہ وقت کی ضرورت
چیف جسٹس آف پاکستان نے اپنے خصوصی پیغام میں کہا کہ یومِ آزادی محض ایک تاریخی یادگار نہیں بلکہ اجتماعی ذمہ داریوں کے اعادے کا دن ہے۔
"ہمیں ایک ایسا معاشرہ تشکیل دینا ہے جہاں ہر فرد روزمرہ زندگی میں انصاف کی موجودگی کو محسوس کرے،” انہوں نے کہا۔
چیف جسٹس کا کہنا تھا کہ آئین، عوام کی امنگوں کا ترجمان اور بنیادی حقوق کی ضمانت ہے، جسے برقرار رکھنا تمام ریاستی اداروں کی دیانتداری اور غیر جانبداری کا تقاضا کرتا ہے۔
وفاقی وزیر خالد حسین مگسی: سائنس، سلامتی اور فخر کا دن
وفاقی وزیر سائنس و ٹیکنالوجی خالد حسین مگسی نے یومِ آزادی پر قوم اور اوورسیز پاکستانیوں کو مبارکباد دیتے ہوئے کہا کہ 14 اگست قربانیوں، شکر اور فخر کی علامت ہے۔
انہوں نے کہا، "ہماری بہادر مسلح افواج نے ہر محاذ پر ملک کا وقار بلند رکھا۔ ‘آپریشن بنیان مرصوص’ قومی سلامتی کی ایک نئی مثال ہے۔”
شرجیل انعام میمن: اتحاد، قربانی اور افواج کے ساتھ کھڑا پاکستان
سینئر وزیر سندھ شرجیل انعام میمن نے کہا کہ 14 اگست قربانیوں اور قومی یکجہتی کا دن ہے۔
انہوں نے کہا، "معرکہ حق اور بنیان مرصوص کی کامیابیاں اس امر کا ثبوت ہیں کہ ہماری افواج ہر محاذ پر قوم کے شانہ بشانہ کھڑی ہیں۔”
انہوں نے جمہوریت پسند قیادت، افواج اور شہداء کو خراج عقیدت پیش کیا اور کہا کہ پاکستان کی ترقی جمہوری اداروں کی مضبوطی سے منسلک ہے۔
ضیاء الحسن لنجار: قانون نافذ کرنے والے ادارے قربانیوں کی علامت
صوبائی وزیر داخلہ سندھ ضیاء الحسن لنجار نے کہا کہ یومِ آزادی ہمیں اُن قربانیوں کی یاد دلاتا ہے جو پولیس، رینجرز اور دیگر قانون نافذ کرنے والے اداروں نے دی ہیں۔
انہوں نے عوام سے اپیل کی کہ حب الوطنی اور اتحاد کے جذبے کے ساتھ ملک کو پرامن اور خوشحال بنانے میں اپنا کردار ادا کریں۔
شازیہ مری: اتحاد، انصاف اور کشمیری عوام سے یکجہتی کا دن
پاکستان پیپلز پارٹی کی رہنما شازیہ مری نے قائداعظمؒ، تحریکِ آزادی کے کارکنان اور افواج پاکستان کو خراج عقیدت پیش کرتے ہوئے کہا،
"معرکہ حق کی کامیابی نے جشن آزادی کو دوگنا خوشیوں میں بدل دیا ہے۔ آج ہمیں اختلافات سے بالاتر ہو کر انصاف، مساوات اور خدمتِ خلق پر متحد ہونا ہوگا۔”
انہوں نے کشمیری عوام سے بھی مکمل یکجہتی کا اظہار کیا۔
وزیراعلیٰ خیبرپختونخوا: قربانیوں اور عہد کی تجدید کا دن
وزیراعلیٰ خیبرپختونخوا علی امین گنڈاپور نے صوبے سمیت پوری قوم کو 78ویں یومِ آزادی پر مبارکباد پیش کرتے ہوئے کہا کہ
"14 اگست صرف خوشی کا دن نہیں بلکہ نظریاتی وابستگی، قربانیوں اور وطن سے عہد وفا کا دن ہے۔”
انہوں نے کہا کہ پاکستان کا قیام مسلمانوں کی طویل جدوجہد اور قربانیوں کا نتیجہ ہے، اور ہمیں اسے ایک فلاحی ریاست میں تبدیل کرنے کے لیے اپنے اسلاف کے نقشِ قدم پر چلنا ہوگا۔
انہوں نے "آپریشن بنیان مرصوص” کی کامیابی کو بھی خراج تحسین پیش کیا اور شہداء کی قربانیوں کو سلام پیش کیا۔
قوم نے آج کے دن عہد کیا ہے کہ وطن عزیز کے دفاع، ترقی، انصاف، جمہوریت اور وحدت کے لیے ہر قربانی دی جائے گی، اور آئندہ نسلوں کے لیے ایک مضبوط، خوشحال اور پرامن پاکستان چھوڑا جائے گا۔
