لاہور (13 اگست 2025): پاکستان تحریک انصاف (پی ٹی آئی) کے سینئر رہنما اعجاز چوہدری کی جیل میں طبیعت بگڑ گئی، جس کے بعد انہیں فوری طور پر پاکستان کڈنی اینڈ لیور انسٹی ٹیوٹ (PKLI) منتقل کر دیا گیا ہے۔
اعجاز چوہدری کے وکیل، رانا مدثر ایڈووکیٹ کے مطابق ان کے مؤکل کو گردوں میں شدید انفیکشن لاحق ہے، جبکہ پتے میں سات پتھریاں بھی پائی گئی ہیں۔ انہوں نے بتایا کہ اعجاز چوہدری کو شدید جسمانی تکلیف کا سامنا ہے اور ان کا وزن اب تک 22 کلوگرام کم ہو چکا ہے۔
جیل حکام کا کہنا ہے کہ اعجاز چوہدری کی بگڑتی صحت کے پیش نظر انہیں فوری طور پر اسپتال منتقل کیا گیا جہاں ان کے مختلف میڈیکل ٹیسٹ جاری ہیں۔
واضح رہے کہ اعجاز چوہدری نو مئی کے جلاؤ گھیراؤ کیسز میں کوٹ لکھپت جیل میں قید ہیں۔ 22 جولائی کو لاہور کی انسدادِ دہشت گردی عدالت نے شیرپاؤ پل کیس میں پی ٹی آئی رہنماؤں، بشمول ڈاکٹر یاسمین راشد، میاں محمود الرشید، اعجاز چوہدری اور سرفراز چیمہ کو 10، 10 سال قید کی سزا سنائی تھی، جبکہ شاہ محمود قریشی سمیت بعض رہنماؤں کو بری کر دیا گیا تھا۔
