پشاور: پاکستان تحریک انصاف (پی ٹی آئی) کے رہنما اور سینیٹر اعظم خان سواتی کو پشاور ایئرپورٹ پر بیرون ملک جانے سے روک دیا گیا، جبکہ گزشتہ روز پشاور ہائی کورٹ کو یقین دہانی کرائی گئی تھی کہ ان کا نام ایگزٹ کنٹرول لسٹ (ای سی ایل) اور پاسپورٹ کنٹرول لسٹ (پی سی ایل) سے نکال دیا گیا ہے اور انہیں سفر کی مکمل اجازت ہے۔
ایکسپریس نیوز کے مطابق، پشاور ہائی کورٹ میں دائر درخواست میں مؤقف اختیار کیا گیا ہے کہ اعظم سواتی کا نام پی سی ایل میں شامل کیا گیا ہے جس کے باعث ایف آئی اے نے انہیں ایئرپورٹ پر روکا ہے۔ درخواست گزار کے وکیل نے عدالت میں بتایا کہ عدالتی حکم کے باوجود اعظم سواتی کو سفر سے روکنا توہین عدالت کے زمرے میں آتا ہے اور وہ آج پشاور ہائی کورٹ میں توہین عدالت کی درخواست دائر کریں گے۔
واضح رہے کہ گزشتہ روز پشاور ہائی کورٹ نے اعظم سواتی کا نام ایگزٹ کنٹرول لسٹ اور پاسپورٹ کنٹرول لسٹ سے نکالنے کی درخواست منظور کی تھی اور کیس نمٹا دیا تھا۔ دوران سماعت اسسٹنٹ اٹارنی جنرل نے عدالت کو مطلع کیا تھا کہ اعظم سواتی کا نام اب کسی بھی پابندی والی فہرست میں شامل نہیں ہے اور انہیں بیرون ملک جانے کی اجازت دی جا چکی ہے۔ ایف آئی اے کے نمائندے نے بھی عدالت کو یقین دہانی کروائی تھی کہ اعظم سواتی اب بغیر کسی رکاوٹ کے سفر کر سکتے ہیں۔
تاہم اس کے باوجود پشاور ایئرپورٹ پر انہیں روانگی سے روک دیا جانا سوالات کو جنم دے رہا ہے اور اس پر قانونی کارروائی کی جارہی ہے۔
