ویب ڈیسک: پاکستان تحریک انصاف (پی ٹی آئی) کے سیکرٹری جنرل سلمان اکرم راجہ نے ایک واضح اور دو ٹوک بیان دیتے ہوئے کہا ہے کہ شیر افضل مروت اب پارٹی کا حصہ نہیں ہیں۔ اس بیان کے ساتھ ہی ان کی پارٹی میں ممکنہ واپسی سے متعلق قیاس آرائیوں کا خاتمہ ہو گیا ہے۔
ذرائع کے مطابق پی ٹی آئی کے پارلیمانی اجلاس میں شیر افضل مروت کی واپسی کے حوالے سے مشاورت ہوئی، جس میں مختلف رہنماؤں نے ان کا مؤقف سننے کی حمایت کی۔ اجلاس میں اسد قیصر، شہریار آفریدی اور نثار جٹ نے ان کی واپسی پر بات کی اور موقف پیش کیا کہ شیر افضل کو اپنی بات رکھنے کا موقع دیا جانا چاہیے۔
دوسری جانب شیر افضل مروت نے کہا کہ اگر پارٹی کے اندر سے ان کے خلاف بیانات آئیں گے تو وہ مجبوراً جواب دیں گے۔ اس موقع پر پارلیمانی پارٹی نے ان سے خاموش رہنے کی درخواست بھی کی۔
مزید برآں، ذرائع کے مطابق پارلیمانی پارٹی اپنے فیصلے اور مؤقف کو بانی پی ٹی آئی کے سامنے رکھے گی تاکہ حتمی فیصلہ کیا جا سکے۔
تاہم سلمان اکرم راجہ کے تازہ بیان کے بعد صورتحال واضح ہو گئی ہے کہ فی الوقت شیر افضل مروت تحریک انصاف کا حصہ نہیں ہیں اور پارٹی قیادت اس پالیسی پر قائم ہے۔
