اسلام آباد: نجی حج آپریٹرز کی اسکیم کے تحت رواں سال حج سے محروم رہ جانے والے تقریباً 25 سے 26 ہزار عازمین کو آئندہ سال بغیر کسی اضافی رقم کے حج ادا کرنے کی اجازت ملے گی۔
ذرائع کے مطابق نجی حج آپریٹرز کی نمائندہ تنظیم HOAP نے وزارت مذہبی امور کو یقین دہانی کرائی ہے کہ ان عازمین کی جمع کروائی گئی رقم سعودی عرب میں محفوظ ہے اور انہیں دوبارہ ادائیگی کی ضرورت نہیں ہوگی۔ اس حوالے سے وفاقی وزیر مذہبی امور نے بھی تصدیق کر دی ہے۔
سعودی عرب کے بینکنگ سسٹم میں "والٹ” اکاؤنٹس کے تحت تقریباً 490 ملین سعودی ریال (تقریباً 36 ارب پاکستانی روپے) نجی اسکیم کے عازمین کے لیے محفوظ ہیں۔
وزارت مذہبی امور کے ذرائع نے بتایا کہ گزشتہ سال 67 ہزار کے حج کوٹے کا دعویٰ کیا گیا تھا، لیکن درحقیقت صرف 63 ہزار کوٹے استعمال ہوئے، جس کی وجہ سے ہزاروں پاکستانی حج سے محروم رہے۔ اس ناکامی کا ذمہ دار وزارت مذہبی امور اور نجی حج آپریٹرز کو قرار دیا گیا ہے۔
سینیٹ کی قائمہ کمیٹی برائے مذہبی امور نے بھی اس معاملے پر وزارت اور نجی آپریٹرز کی ناقص کارکردگی پر شدید تشویش کا اظہار کیا ہے۔
