وفاقی دارالحکومت اسلام آباد سمیت پنجاب، خیبر پختونخوا، آزاد کشمیر اور گلگت بلتستان کے مختلف علاقوں میں ہفتہ کے روز زلزلے کے جھٹکے محسوس کیے گئے، تاہم خوش آئند بات یہ ہے کہ کسی جانی یا مالی نقصان کی اطلاع موصول نہیں ہوئی۔
زلزلہ پیما مرکز کے مطابق، ریکٹر اسکیل پر زلزلے کی شدت 5.4 ریکارڈ کی گئی، جس کی گہرائی 122 کلومیٹر تھی جبکہ مرکز کوہ ہندوکش میں واقع تھا۔ زلزلے کا مرکز ضلع باجوڑ سے تقریباً 102 کلومیٹر دور تھا۔
زلزلے کے جھٹکے لاہور، راولپنڈی، اسلام آباد، پشاور، ہری پور، ایبٹ آباد، چارسدہ، سوات، ہزارہ ڈویژن، گلگت بلتستان اور آزاد کشمیر کے مختلف علاقوں میں محسوس کیے گئے۔ اس دوران اسلام آباد میں شدید بارش کا سلسلہ بھی جاری تھا، جس سے موسم مزید سرد ہو گیا۔
گلگت بلتستان کے علاقوں سمیت افغانستان اور تاجکستان میں بھی زلزلے کے اثرات محسوس کیے گئے۔ شہری خوفزدہ ہو کر کلمہ طیبہ کا ورد کرتے ہوئے گھروں سے باہر نکل آئے تاہم کسی بھی قسم کے نقصان کی کوئی اطلاع سامنے نہیں آئی، جو کہ اطمینان بخش امر ہے۔
ریسکیو ادارے ہائی الرٹ پر ہیں جبکہ ماہرین عوام کو محفوظ مقامات پر رہنے اور کسی بھی ہنگامی صورتحال میں ہیلپ لائنز سے رابطہ کرنے کی ہدایت کر رہے ہیں۔
