سینیٹر فیصل واوڈا کا چیئرمین ایف بی آر کو خراجِ تحسین: "اچھے اقدامات کے لیے ہم سب ساتھ ہیں”
اسلام آباد: سینیٹر فیصل واوڈا نے چیئرمین ایف بی آر (فیڈرل بورڈ آف ریونیو) کی جانب سے مثبت اصلاحاتی اقدامات پر اعتماد کا اظہار کرتے ہوئے انہیں بھرپور حمایت کی یقین دہانی کرائی ہے۔
سماجی رابطے کی ویب سائٹ ‘ایکس’ (سابقہ ٹوئٹر) پر جاری اپنے بیان میں فیصل واوڈا نے کہا:
"چیئرمین ایف بی آر صاحب! آپ اپنی مثبت کوششیں جاری رکھیں، ہم سب مل کر آپ کو سپورٹ کر رہے ہیں۔”
انہوں نے ایف بی آر کے ایک افسر کو معطل کرنے اور نوکری سے برطرفی کی کارروائی شروع کرنے کے فیصلے کو چیئرمین کی نیک نیتی قرار دیتے ہوئے کہا کہ یہ اقدام اصلاحاتی عمل کی سنجیدگی کا مظہر ہے۔
سینیٹر فیصل واوڈا کا کہنا تھا:
"ہمیں عوام کی خدمت کرنی ہے، بدمعاشی نہیں۔ نظام بگڑا ہوا ہے، لیکن جب نیت ٹھیک ہو تو بہتری آ ہی جاتی ہے۔”
انہوں نے زور دیا کہ:
"کاروباری طبقے کو عزت اور احترام دیا جائے، وہ ملک کے لیے ہر ممکن قدم اٹھانے کو تیار ہوتے ہیں — یہ ہمارا قیمتی سرمایہ ہیں۔”
فیصل واوڈا نے مزید کہا کہ ایف بی آر جیسے ادارے میں تبدیلی وقت لے سکتی ہے، مگر اگر قیادت مخلص ہو تو اصلاحات ممکن ہیں۔ اُن کا کہنا تھا کہ وہ ذاتی طور پر بھی چیئرمین کے اچھے اقدامات کی حمایت جاری رکھیں گے۔
