کراچی: پاک فوج کے شعبہ تعلقات عامہ (آئی ایس پی آر) کے ڈائریکٹر جنرل لیفٹیننٹ جنرل احمد شریف چوہدری نے کہا ہے کہ مٹھی بھر دہشت گرد بلوچستان سمیت پورے پاکستان کی ترقی اور خوشحالی کی راہ میں رکاوٹ نہیں بن سکتے۔
انہوں نے یہ بات کنگ ایڈورڈ میڈیکل یونیورسٹی لاہور کے دورے کے موقع پر طلبا و طالبات سے خطاب کرتے ہوئے کہی۔ یونیورسٹی آمد پر انتظامیہ اور طلبا کی جانب سے پرتپاک استقبال کیا گیا۔
آپریشن بنیان مرصوص پر روشنی
ڈی جی آئی ایس پی آر نے خطاب کے دوران آپریشن بنیان مرصوص میں پاک فوج کی حکمت عملی، کامیابیوں اور چیلنجز پر تفصیل سے روشنی ڈالی۔ ان کا کہنا تھا کہ:
"معرکۂ حق میں فتحِ مُبین عوام کی حمایت اور خصوصاً نوجوانوں کی شمولیت کے بغیر ممکن نہیں تھی۔”
انہوں نے کشمیر کو پاکستان کی شہ رگ قرار دیتے ہوئے اس بات کا اعادہ کیا کہ:
"کشمیر پاکستان کی شہ رگ تھا، ہے اور ہمیشہ رہے گا۔”
بلوچستان کا پاکستان سے اٹوٹ رشتہ
لیفٹیننٹ جنرل احمد شریف چوہدری کا کہنا تھا کہ بلوچ عوام پاکستان کے ساتھ تاریخی، مذہبی، ثقافتی اور روایتی رشتوں میں بندھے ہوئے ہیں۔ انہوں نے زور دے کر کہا:
"چند عناصر بلوچستان کو غیر مستحکم کرنا چاہتے ہیں، لیکن وہ پاکستان کی مجموعی ترقی کا راستہ کبھی نہیں روک سکتے۔”
طلبا کا جوش و خراجِ تحسین
آئی ایس پی آر کے مطابق، طلبا و طالبات نے آپریشن بنیان مرصوص میں پاک افواج کی کامیابیوں کو سراہا اور افواجِ پاکستان کو خراجِ تحسین پیش کیا۔ اس موقع پر فیکلٹی ممبران اور طلبا نے مزید ایسے انٹریکٹو سیشنز کے انعقاد کی خواہش کا اظہار کیا، تاکہ نوجوان نسل کو ملکی دفاع، قومی یکجہتی اور عسکری قربانیوں سے بہتر طور پر آگاہ کیا جا سکے۔
