اسلام آباد — وزیر مملکت برائے داخلہ، طلال چوہدری نے کہا ہے کہ 9 مئی 2023 کو پیش آنے والے پرتشدد واقعات میں ایک ڈی آئی جی کی آنکھ ضائع ہو گئی، اور وہ تاحال کوما میں ہیں۔ ان کا کہنا تھا کہ یہ واقعات منصوبہ بندی کے تحت کیے گئے اور اس میں پاکستان تحریکِ انصاف (پی ٹی آئی) کی قیادت براہ راست ملوث ہے۔
اپنے بیان میں طلال چوہدری نے کہا کہ لاہور میں 9 مئی کو 14 مختلف مقامات پر پُرتشدد مظاہرے ہوئے، جن میں جناح ہاؤس، تھانوں، سرکاری و نجی املاک کو نذرِ آتش کیا گیا۔ ان واقعات میں 82 پولیس اہلکار زخمی ہوئے، جب کہ سرور روڈ پر سرکاری گاڑیوں کو بھی آگ لگائی گئی۔
انہوں نے مزید کہا کہ ان واقعات میں ملوث 14 ملزمان میں سے 6 کو عدالتوں نے بری کر دیا، جبکہ 8 کو سزائیں سنائی گئیں۔ ان کے بقول، 9 مئی کو پی ٹی آئی کی قیادت کی ہدایت پر مظاہرین کور کمانڈر ہاؤس (جناح ہاؤس) پہنچے، اور سوشل میڈیا کے ذریعے مسلسل رہنماؤں سے رابطے میں تھے۔
طلال چوہدری نے کہا کہ پی ٹی آئی رہنماؤں اور کارکنوں کے خلاف ویڈیو شواہد موجود ہیں، اور قانون کے مطابق ان کی سزائیں پہلے ہی ہونی چاہیئے تھیں۔ ان کا کہنا تھا کہ شواہد کی بنیاد پر ہی عدالتوں نے سزا سنائی ہے، اور یہ عمل قانون کی عملداری اور انصاف کے تقاضوں کے مطابق جاری ہے۔
وزیر مملکت کا یہ بیان ایک ایسے وقت پر سامنے آیا ہے جب 9 مئی کے واقعات کی تحقیقات اور قانونی کارروائیاں جاری ہیں، اور ان میں پیش رفت کو ملک کی سیاسی صورتحال پر گہرے اثرات کے طور پر دیکھا جا رہا ہے۔
