برطانوی کمپنی ’بو‘ نے دنیا کی تیز ترین ای اسکوٹر ’ٹربو‘ متعارف کرادی
لندن – برطانوی کمپنی ’بو‘ نے اپنی جدید ای اسکوٹر ’ٹربو‘ کی رونمائی کر دی ہے، جو دنیا کی تیز ترین ای اسکوٹر قرار پائی ہے اور 100 میل فی گھنٹہ کی رفتار سے سفر کرنے کی صلاحیت رکھتی ہے۔
’بو‘ کے سی ای او آسکر مورگن نے کہا ہے کہ جب اس پروجیکٹ پر کام شروع کیا تو ان کی ٹیم کو احساس ہوا کہ وہ ایک ’مونسٹر‘ تیار کر رہے ہیں، جس کی طاقت اور کارکردگی ہر تصور سے آگے ہے۔
آسکر مورگن کے مطابق،
"ای اسکوٹر مقامی سطح پر لوگوں کی نقل و حرکت میں انقلاب لا رہی ہیں، لیکن ہمارا ہدف انہیں مین اسٹریم آٹوموٹو کلچر میں شامل کرنا ہے۔ ٹربو کے ذریعے ہم مستقبل کی برقی گاڑیوں کو صفِ اول کی کارکردگی پر لے آنا چاہتے ہیں۔”
یہ ای اسکوٹر 18 ماہ کی محنت اور جدید ٹیکنالوجی کا نتیجہ ہے، جس کی بیس قیمت 29,500 ڈالر مقرر کی گئی ہے۔
ٹربو میں 24,000 واٹ کا ڈوئل موٹر پروپلژن سسٹم نصب ہے جو اسے زبردست طاقت فراہم کرتا ہے، جبکہ 1800 واٹ آور کی مرکزی بیٹری بیک وقت 1500 آئی فونز کو فاسٹ چارج کرنے کے قابل ہے، جو اس کی جدیدیت اور کارکردگی کا منہ بولتا ثبوت ہے۔
