تبریز: ایرانی صدر مسعود پزشکیان نے ایک مثالی عوامی رویہ اپناتے ہوئے تبریز کے سفر کے دوران ٹیکسی کا استعمال کیا، جب ان کے قافلے کی گاڑیاں غیر معیاری پیٹرول کی وجہ سے رُک گئیں۔
روسی میڈیا کی رپورٹ کے مطابق، صدر پزشکیان قزوین سے تبریز کی جانب سفر پر تھے جب ان کے قافلے کی تین سرکاری گاڑیوں کو ایک مقامی پیٹرول اسٹیشن سے ایندھن فراہم کیا گیا۔ بدقسمتی سے، پیٹرول میں پانی کی ملاوٹ کے باعث گاڑیاں راستے میں بند ہو گئیں۔
صورتحال کا فوری حل نکالتے ہوئے، صدر نے کسی قسم کی خصوصی سہولیات کا انتظار کرنے کے بجائے ایک نجی ٹیکسی حاصل کی اور تبریز کے لیے روانہ ہو گئے۔ ان کا یہ عمل عوامی حلقوں میں خوب سراہا جا رہا ہے اور اسے سادگی و خدمتِ عوام کی ایک روشن مثال قرار دیا جا رہا ہے۔
ایرانی صدر کا یہ قدم نہ صرف عاجزی کا مظہر ہے بلکہ حکومتی اداروں کے لیے بھی ایک پیغام ہے کہ عوامی مسائل سے نمٹنے میں خود کو بالاتر نہ سمجھا جائے۔
