اسلام آباد: فیڈرل بورڈ آف انٹرمیڈیٹ اینڈ سیکنڈری ایجوکیشن (FBISE) نے سال 2025 کے نہم و دہم کے سالانہ امتحانات کے نتائج کا اعلان کر دیا۔ امتحانات میں مجموعی طور پر 2 لاکھ 84 ہزار 37 طلباء و طالبات نے حصہ لیا جن میں سے کامیاب امیدواروں کا تناسب 88.51 فیصد رہا، جو کہ ایک حوصلہ افزا کارکردگی ہے۔
سائنس گروپ میں طالبات نے میدان مار لیا
سائنس گروپ میں تینوں پوزیشنز طالبات کے نام رہیں۔ آرمی پبلک اسکول راولپنڈی کی طالبہ مریم نوید نے 1093 نمبر حاصل کرتے ہوئے پورے بورڈ میں پہلی پوزیشن حاصل کی۔ آمنہ ناصر، جو کہ لاہور گرامر اسکول سے تعلق رکھتی ہیں، نے 1087 نمبر حاصل کر کے دوسری پوزیشن اپنے نام کی۔ تیسری پوزیشن 1083 نمبروں کے ساتھ صالحہ ثاقب نے حاصل کی، جو املہ فاؤنڈیشن اسکول، مصریال راولپنڈی کی طالبہ ہیں۔
ہیومینیٹیز گروپ میں بھی شاندار کارکردگی
ہیومینیٹیز گروپ میں ثناء بی بی نے شائننگ اسٹار اسکول کی نمائندگی کرتے ہوئے 1045 نمبر لے کر پہلی پوزیشن حاصل کی۔ دوسری پوزیشن ادارہ علوم اسلامی کے طالبعلم عبدالرحمان نے 1029 نمبر حاصل کر کے حاصل کی، جبکہ تیسری پوزیشن اسی ادارے کے محمد سفیان احمد نے 1022 نمبر حاصل کر کے حاصل کی۔
فیڈرل بورڈ کے چیئرمین نے نتائج کے موقع پر کامیاب طلباء و طالبات، ان کے والدین، اور اساتذہ کو مبارکباد دیتے ہوئے کہا کہ یہ نتائج طلباء کی محنت، اساتذہ کی رہنمائی اور والدین کی دعاؤں کا نتیجہ ہیں۔ انہوں نے مزید کہا کہ بورڈ تعلیمی معیار کو مزید بہتر بنانے کے لیے کوشاں ہے۔
