لاہور: پاکستان تحریک انصاف (پی ٹی آئی) کی سینئر رہنما اور سابق وزیر صحت پنجاب ڈاکٹر یاسمین راشد کی طبیعت اچانک ناساز ہو گئی، جس کے باعث انہیں کوٹ لکھپت جیل سے فوری طور پر سروسز اسپتال منتقل کر دیا گیا۔
ڈاکٹر یاسمین راشد کے وکیل رانا مدثر کے مطابق انہیں سانس لینے میں دشواری، معدے میں جلن اور پیٹ میں شدید تکلیف کی شکایت تھی۔ اسپتال ذرائع کے مطابق ان کا بلڈ پریشر بلند اور دل کی دھڑکن غیر معمولی طور پر تیز تھی، جس پر انہیں فوری طبی امداد دی گئی۔
اسپتال انتظامیہ کے مطابق ڈاکٹر یاسمین راشد کی ابتدائی طبی جانچ مکمل کر لی گئی ہے اور ان کی حالت اب خطرے سے باہر بتائی جا رہی ہے۔ تاہم انہیں مزید نگرانی میں رکھا جائے گا اور مکمل تشخیص کے لیے ضروری ٹیسٹ کیے جا رہے ہیں۔
ڈاکٹر یاسمین راشد ایک سینئر معالج اور سیاسی رہنما ہیں، اور ان کی صحت سے متعلق خبریں سیاسی و سماجی حلقوں میں تشویش کا باعث بنی ہوئی ہیں۔ پی ٹی آئی کی قیادت اور کارکنان نے ان کی جلد صحتیابی کے لیے نیک خواہشات کا اظہار کیا ہے۔
