بھارتی فلمی دنیا کے ممتاز اداکار کوٹا سرینواسا راؤ کا انتقال، 700 سے زائد فلموں میں اداکاری کا شاندار کیریئر
حیدرآباد: بھارتی فلم انڈسٹری کے جانے مانے اداکار کوٹا سرینواسا راؤ دنیا سے رخصت ہوگئے ہیں۔ دو دن قبل اپنی 83ویں سالگرہ منانے والے کوٹا سرینواسا راؤ کی موت اتوار کی صبح حیدرآباد دکن میں ان کے گھر پر ہوئی۔ اداکار کافی عرصے سے علیل تھے۔
آندھرا پردیش کے رہائشی کوٹا سرینواسا راؤ نے 1978 میں اپنے فلمی کیریئر کا آغاز کیا اور چار دہائیوں پر محیط اپنی محنت اور قابلیت سے بھارتی سنیما میں اپنی خاص پہچان بنائی۔ انہوں نے تیلگو، تامل، کنڑ اور ہندی زبانوں کی فلموں میں 700 سے زائد کردار ادا کیے، جن میں ان کا خاصہ منفی کرداروں اور منفرد کیریکٹر رولز میں بہترین اداکاری کے لیے تھا۔
اپنے کیریئر میں ان کی خدمات کو سراہتے ہوئے انہیں کئی قومی اعزازات سے نوازا گیا، جن میں 2015 میں دیا جانے والا ’پدما شری‘ ایوارڈ بھی شامل ہے، جو بھارت کا چوتھا سب سے بڑا سول ایوارڈ ہے۔
کوٹا سرینواسا راؤ نے اداکاری کے علاوہ سیاست میں بھی حصہ لیا اور 1999 سے 2004 تک بھارتیہ جنتا پارٹی کے رکن اسمبلی (ایم ایل اے) کے طور پر عوامی خدمت انجام دی۔
ان کے انتقال سے بھارتی فلمی دنیا اور شائقین کے درمیان گہرا غم چھا گیا ہے، جنہوں نے اپنی اداکاری اور خدمات سے سنیما کو بے حد متاثر کیا۔ کوٹا سرینواسا راؤ کی یاد ہمیشہ زندہ رہے گی۔
