امریکہ میں ٹوائلٹ کے شاور کا پریشر بڑھانے کے لیے صدر ٹرمپ کا نیا حکم نامہ

صدر ڈونلڈ ٹرمپ نے بدھ کو ایک ایگزیکٹو آرڈر پر دستخط کیے ہیں جس کے تحت، امریکہ میں شاور سے پانی کی مقدار کی قانونی حد ختم کی جا رہی ہے۔

یہ قانون حد 1992 میں اس وقت کے صدر جارج ایچ ڈبلیو بُش، کے دور میں مقرر کی گئی تھی تاکہ پانی کو ضائع ہونے سے بچایا جا سکے۔ اس کے تحت شاور بنانے والی کمپنیوں کو ایسے ڈیزائن اور پریشر کا پابند کیا گیا تھا کہ اس میں سے ایک منٹ کے دوران، 2.5 گیلن سے زیادہ پانی نہیں بہنا چاہیے۔

صدر ٹرمپ نے اسے غیر ضروری قانونی قدغن قرار دیتے ہوئے، اپنے پہلے دور حکومت میں بھی نرمی کر دی تھی لیکن بعد میں، سابق صدر جو بائیڈن نے شاور سے پانی کی حد کے قانون کو بحال کر دیا۔

اب پھر صدر ٹرمپ نے شاور سے پانی کے پریشر کے قانون کو ختم کر دیا ہے اور ان کے حامی اسے امریکی شاور کو پھر سے ’عظیم‘ بنانے کا اقدام قرار دے رہے ہیں۔