شیف ذاکر حسین گردوں کے مرض کے باعث 58 برس کی عمر میں انتقال کر گئے

بین الاقوامی شہرت یافتہ پاکستانی شیف ذاکر حسین پیر کو کراچی میں انتقال کر گئے۔ وہ گردوں کے طویل عارضے میں مبتلا تھے اور مقامی اسپتال میں زیر علاج تھے۔ اہل خانہ کے مطابق ان کی عمر 58 برس تھی اور وہ کچھ عرصے سے ڈائیلاسز کے مرحلے سے گزر رہے تھے۔

خاندانی ذرائع نے بتایا کہ شیف ذاکر حال ہی میں امریکہ سے واپس آئے تھے، جہاں وہ علاج کی غرض سے مقیم تھے۔ ڈاکٹروں کی جانب سے مرض کو لاعلاج قرار دیے جانے کے بعد وہ ایک ماہ قبل وطن لوٹے تھے، تاہم واپسی کے بعد ان کی طبیعت مسلسل خراب رہی۔

شیف ذاکر کا شمار ملک کے ممتاز ٹی وی شیفس میں ہوتا تھا۔ انہوں نے پاکستانی کھانوں کو نہ صرف ٹیلی وژن کے ذریعے گھر گھر متعارف کروایا بلکہ روایتی ترکیبوں کو سادہ اور قابلِ فہم انداز میں پیش کر کے گھریلو کچن میں ککنگ کو عام بنایا۔

ان کے منفرد اندازِ پیشکش اور سادہ زبان نے انہیں ملک بھر میں مقبول بنایا۔ متعدد ٹی وی پروگرامز میں ان کی موجودگی نے انہیں ایک قابلِ اعتماد شیف کے طور پر متعارف کروایا، جس سے نوجوانوں کو بھی اس پیشے کی جانب راغب ہونے میں مدد ملی۔

زاکر کی نمازِ جنازہ کراچی میں ادا ہونے کے بعد وہیں سپردِ خاک ہوں گے۔ ان کے انتقال پر شیف برادری، ہوٹلنگ انڈسٹری اور مداحوں نے گہرے رنج و غم کا اظہار کیا ہے۔