امریکی صدر ڈونلڈ ٹرمپ کا کہنا ہے کہ امریکا کو پہلے سے زیادہ طاقتور بنانے کے لیے دنیا کے سامنے مزید مضبوطی سے کھڑا ہونا ہوگا۔ واشنگٹن میں قومی دعائیہ ناشتے سے خطاب کرتے ہوئے امریکی صدر نے کہا کہ آزادی اظہار کا ہر قیمت پر تحفظ ہونا چاہیے، ہم سب جانتے ہیں کہ کیا صحیح ہے اور کیا غلط۔ڈونلڈ ٹرمپ نے کہا کہ آج کے دور میں درمیانی جگہ تلاش کرنا بہت مشکل ہو گیا ہے۔امریکی صدر نے پوٹومیک فضائی حادثے کا گولف سے موازنہ کرتے ہوئے کہا کہ گالف میں کبھی ایک گیند کو دوسری گیند سے ٹکراتے ہوئے نہیں دیکھا، بہت سی غلطیاں ہوئیں جو نہیں ہونی چاہئیں تھیں، ایئر ٹریفک کنٹرول کے لیے نیا کمپیوٹرائزڈ نظام متعارف کرائیں گے۔ٹرمپ نے کہا کہ امریکہ کو پہلے سے زیادہ طاقتور بنائیں گے، ہمیں دنیا کے سامنے مزید مضبوطی سے کھڑا ہونا ہے۔واضح رہے کہ چیئرمین پیپلز پارٹی بلاول بھٹو زرداری نے بھی قومی دعائیہ ناشتے میں شرکت کی۔علاوہ ازیں امریکی صدر ٹرمپ نے ایکس پر بیان جاری کرتے ہوئے کہا کہ جنگ کے خاتمے کے بعد غزہ کی پٹی کو اسرائیل کے حوالے کر دیا جائے گا۔انہوں نے کہا کہ اس وقت تک فلسطینی اس خطے میں نئے اور جدید گھروں کے ساتھ کہیں زیادہ محفوظ اور خوبصورت کمیونٹیز کے ساتھ آباد ہو چکے ہوں گے۔ٹرمپ کے اعلان پر اقوام متحدہ اور دنیا کے کئی ممالک نے فلسطینیوں کو غزہ سے نکالنے کی مخالفت کی اور دو ریاستی حل پر اصرار کیا۔
