مسلم لیگ ن کے صدر اور سابق وزیراعظم نواز شریف نے کہا ہے کہ مہنگائی میں کمی معاشی بہتری کا اشارہ ہے۔لاہور میں نواز شریف اور وزیراعلیٰ پنجاب مریم نواز سے اراکین پنجاب اسمبلی نے ملاقات کی۔ملاقات میں ملک کی مجموعی صورتحال، ترقیاتی عمل اور عوامی خدمت کے منصوبوں پر غور کیا گیا۔اس موقع پر نواز شریف نے کہا کہ اسٹاک ایکسچینج میں اضافہ کاروباری اور سرمایہ کار برادری کے اعتماد کا عکاس ہے۔انہوں نے کہا کہ پاکستان کو جس ڈپریشن کی طرف دھکیلا گیا اس میں رکنا خوش آئند ہے، وزیر اعظم شہباز شریف وفاق میں محنت کر رہے ہیں۔سابق وزیراعظم کا کہنا ہے کہ مریم نواز پنجاب میں وزیراعلیٰ سے زیادہ ماں اور بیٹی کے جذبے سے کام کر رہی ہیں، اللہ تعالیٰ ان لوگوں کا ہاتھ پکڑتا ہے جو نیک نیت اور محنت سے اپنی مخلوق کی خدمت کرتے ہیں۔گفتگو کرتے ہوئے مریم نواز نے کہا کہ نواز شریف کی بیٹی ہونے کے ناطے زیادہ ذمہ داری محسوس کرتی ہوں، وزیراعظم شہباز شریف کی مثالی عوامی خدمت کے حوالے سے بھی ذمہ داری ہے۔مریم نواز کا کہنا ہے کہ سب کی رہنمائی اور اعتماد ہی ہماری طاقت اور کامیابی کی کلید، عوامی خدمت کے معیار اور رفتار سے متعلق ماضی کی روایت آپ آگے بڑھ رہے ہیں۔
