پشاور: 20 سال بعد ارباب نیاز کرکٹ اسٹیڈیم میں میچ کروانے پر غور

ارباب نیاز کرکٹ سٹیڈیم میں 20 سال بعد کرکٹ میچ کے انعقاد پر غور کیا جا رہا ہے۔پولیس حکام کے مطابق آئی سی سی کی ٹیم نے پی ایس ایل میچ کے انعقاد کے لیے ارباب نیاز سٹیڈیم کا دورہ کیا۔حکام کا کہنا ہے کہ آئی سی سی ٹیم نے غیر ملکی کھلاڑیوں کے لیے گراؤنڈ، پویلین، ایریا روٹ اور ہوٹل کے راستے کا سروے کیا۔ پشاور پولیس چیف نے آئی سی سی ٹیم کو سیکیورٹی صورتحال پر بریفنگ دی۔پولیس حکام کا کہنا تھا کہ شائقین کے لیے شٹل سروس، ڈرون کیمرے کی نگرانی اور اسٹیڈیم کے قریب ہیلی پیڈ بنایا جائے گا۔ پی سی بی اپریل میں پی ایس ایل کے دو میچ پشاور میں کرانے پر غور کر رہا ہے۔حکام کا یہ بھی کہنا ہے کہ غیر ملکی کھلاڑیوں کی سیکیورٹی کے لیے تسلی بخش انتظامات کیے جائیں گے۔واضح رہے کہ ارباب نیاز اسٹیڈیم میں آخری میچ 2006 میں پاکستان اور بھارت کے درمیان کھیلا گیا تھا۔