بھارتی بیٹر کی انگلینڈ کیخلاف ٹی ٹوئنٹی میں دھواں دار اننگز،کئی اہم ریکارڈز اپنے نام کرلیے

بھارتی کرکٹ ٹیم کے نوجوان بلے باز ابھیشیک شرما نے انگلینڈ کے خلاف ٹی ٹوئنٹی میچ میں دھواں دھار اننگز کھیل کر کئی ریکارڈ اپنے نام کر لیے۔انگلینڈ اور بھارت کے درمیان سیریز کا پانچواں اور آخری ٹی ٹوئنٹی میچ اتوار کو ممبئی میں کھیلا گیا۔انگلینڈ کی دعوت پر بیٹنگ کرتے ہوئے بھارت نے مقررہ 20 اوورز میں 9 وکٹوں پر 247 رنز کا پہاڑ کھڑا کر دیا۔بھارتی ٹیم کی جانب سے نوجوان اوپنر ابھیشیک شرما نے ریکارڈ اننگز کھیلی۔ابھیشیک شرما نے 37 گیندوں پر سنچری اسکور کی اور 54 گیندوں پر 13 چھکوں اور 7 چوکوں کی مدد سے مجموعی طور پر 135 رنز بنائے۔ابھیشیک نے T20 انٹرنیشنل میں ہندوستان کے لیے دوسری تیز ترین سنچری بنائی۔ اس سے قبل روہت شرما نے 35 گیندوں پر سنچری بنائی۔ ابھیشیک شرما انگلینڈ کے خلاف 135 رنز کی اننگز کی بدولت T20 انٹرنیشنل میں ہندوستان کے سب سے زیادہ انفرادی سکورر بن گئے۔اس سے قبل یہ ریکارڈ شبمن گل کے پاس تھا جنہوں نے 126 رنز کی اننگز کھیلی تھی انگلینڈ کے خلاف 13 چھکے لگانے والے ابھیشیک شرما نے ایک T20I میچ میں ہندوستان کی طرف سے ایک اننگز میں سب سے زیادہ چھکے لگانے کا ریکارڈ بھی قائم کیا۔بھارتی ٹیم کے 247 رنز کے جواب میں انگلش ٹیم 11ویں اوور میں صرف 97 رنز پر ڈھیر ہو گئی اور اس طرح بھارت نے انگلینڈ کے خلاف 5 میچوں کی سیریز 1-4 سے جیت لی۔