وزیر اعظم پاکستان میاں محمد شہباز شریف آج ایک روزہ دورے پر کوئٹہ جائیں گے، دورے کے دوران وزیر اعظم کوئٹہ میں امن و امان کے حوالے سے اجلاس کی صدارت کریں گے۔صوبائی حکام کے مطابق وزیراعظم میاں شہباز شریف ایک روزہ دورے پر آج صبح کوئٹہ پہنچیں گے، وفاقی وزیر داخلہ محسن نقوی، جام کمال خان اور دیگر وفاقی وزرا بھی ان کے ہمراہ ہوں گے۔وزیراعظم میاں شہباز شریف ایئرپورٹ سے وزیراعلیٰ ہاؤس جائیں گے جہاں وہ امن و امان کے حوالے سے اجلاس کی صدارت کریں گے۔ اجلاس میں گورنر بلوچستان شیخ جعفر مندوخیل، وزیراعلیٰ میر سرفراز بگٹی اور دیگر عسکری و سول حکام بھی شرکت کریں گے۔ملاقات میں بلوچستان میں دہشت گردی کی روک تھام سمیت دیگر امور پر غور کیا جائے گا۔ اجلاس میں صوبے میں قیام امن کے حوالے سے اہم فیصلے بھی متوقع ہیں۔
