اسلام آباد میں منعقدہ تقریب کے دوران وزیراعظم شہباز شریف نے بچوں کو قطرے پلا کر رواں سال کی پہلی پولیو مہم کا افتتاح کیا، مہم میں 2 کروڑ 33 لاکھ بچوں کو قطرے پلائے جائیں گے اور 2 لاکھ سے زائد کارکن ڈیوٹی سرانجام دیں گے۔اس موقع پر گفتگو کرتے ہوئے وزیر اعظم شہباز شریف نے کہا کہ آج ہم 2025 کی پہلی انسداد پولیو مہم کا آغاز کر رہے ہیں اور لاکھوں بچوں کو پولیو کے قطرے پلا کر پولیو سے محفوظ بنائیں گے۔شہباز شریف نے کہا کہ رواں سال جنوری میں اب تک صرف ایک کیس رپورٹ ہوا ہے اور میری خواہش ہے کہ اس سال ایک کیس بھی سامنے نہ آئے لیکن ہم عالمی اداروں اور شراکت داروں کے ساتھ مل کر پولیو کا خاتمہ کریں گے اور بچوں کا مستقبل محفوظ بنائیں گے۔ انہوں نے کہا کہ گزشتہ سال تقریباً 77 پولیو کیسز رپورٹ ہوئے ہیں اور وہ پولیو کے خاتمے کے لیے افغانستان سے رابطے میں ہیں۔
