وزیر اعلیٰ پنجاب مریم نواز نے کہا ہے کہ پنجاب سب کا ہے، یہاں ہر کوئی اپنی عبادت بغیر کسی خوف کے ادا کر سکتا ہے۔بین المذاہب ہم آہنگی کے عالمی ہفتہ کے موقع پر اپنے پیغام میں مریم نواز نے کہا کہ تمام مذاہب محبت، امن اور رواداری کا درس دیتے ہیں جو حقیقی معنوں میں فلاحی معاشرے کی بنیاد ہے۔مریم نواز نے کہا کہ عقائد کا احترام اور ہم آہنگی کو فروغ دینا ہی پائیدار امن اور ترقی کا ضامن ہے، پاکستان ہمیشہ سے مختلف مذاہب، ثقافتوں اور روایات کا خوبصورت گلدستہ رہا ہے۔انہوں نے کہا کہ اقلیتی کارڈ کے آغاز سے غریب اقلیتی بہن بھائیوں کو سہ ماہی مالی امداد دی جارہی ہے، اقلیتوں کے لیے تعلیم اور روزگار کے مواقع میں اضافہ کیا جارہا ہے۔وزیر اعلیٰ پنجاب نے یہ بھی کہا کہ محبت، بھائی چارے اور امن کا پیغام عام کریں، ایسا معاشرہ بنائیں جہاں انتہا پسندی کی کوئی گنجائش نہ ہو۔
