پاکستان تحریک انصاف (پی ٹی آئی) کے رہنما اور اپوزیشن لیڈر عمر ایوب کا کہنا ہے کہ مہنگائی مزید بڑھے گی۔لاہور میں انسداد دہشت گردی کی عدالت کے باہر میڈیا سے گفتگو کرتے ہوئے اپوزیشن لیڈر عمر ایوب نے کہا کہ حکومت کے پاس کوئی پالیسی نہیں۔ مہنگائی مزید بڑھے گی۔ ایف بی آر گاڑیاں خریدنے جا رہا ہے، ہم اس کی شدید مذمت کرتے ہیں۔عمر ایوب نے مزید کہا کہ پنجاب کی انتظامیہ پی ٹی آئی کو جلسے کی اجازت نہیں دے رہی۔ اگر 500 ارب روپے کا پیٹرول بلوچستان کے راستے اسمگل ہوا تو اس کا ذمہ دار کون ہے؟ پی ٹی آئی کے بانی عمران خان اور بشریٰ بی بی سیاسی قیدی ہیں۔دوسری جانب لاہور کی انسداد دہشت گردی عدالت نے 9 مئی کے 3 مقدمات میں عمر ایوب کی عبوری ضمانت میں 18 فروری تک توسیع کردی، عدالت نے پولیس کو تفتیش مکمل کرنے کی ہدایت کردی۔انسداد دہشت گردی کی عدالت کے جج منظر علی گل نے استفسار کیا کہ کیا عمر ایوب سے تفتیش مکمل ہو گئی ہے، جس پر پولیس نے جواب دیا کہ نہیں، ابھی بیان ریکارڈ ہونا باقی ہے۔ عمر ایوب نے عدالت کو بتایا کہ میں خود جے آئی ٹی میں گیا تھا لیکن اپنا موقف پیش نہیں کر سکا۔
