پاکستان تحریک انصاف نے سپیکر قومی اسمبلی اور حکومتی مذاکراتی کمیٹی کے سربراہ ایاز صادق کے رابطہ کرنے کے باوجود آج کے اجلاس میں بیٹھنے سے انکار کر دیا۔اسپیکر قومی اسمبلی نے پی ٹی آئی کی مذاکراتی کمیٹی کو اجلاس میں شرکت کی دعوت دیتے ہوئے کہا کہ تمام مسائل مذاکرات سے حل کیے جاسکتے ہیں، ٹیبل ٹاک اور مذاکرات سے مسائل حل کیے جاسکتے ہیں۔عمر ایوب نے سپیکر ایاز صادق کو بانی پی ٹی آئی کے فیصلے سے آگاہ کرتے ہوئے کہا کہ حکومت نے ہمارے مطالبات پر تاخیری حربے اختیار کیے، جوڈیشل کمیشن کی تشکیل کے بغیر مذاکرات آگے نہیں بڑھ سکتے۔ذرائع کے مطابق پی ٹی آئی نے آج کے مذاکراتی اجلاس میں شرکت نہ کرنے کا فیصلہ کرتے ہوئے ہدایت کی ہے کہ اپوزیشن ارکان اجلاس میں شرکت نہ کریں۔ذرائع کا کہنا ہے کہ بانی چیئرمین کے کہنے پر پی ٹی آئی نے مذاکراتی اجلاس میں شرکت نہ کرنے کا فیصلہ کیا اور جوڈیشل کمیشن کی تشکیل کے اپنے مطالبے پر قائم ہے۔پی ٹی آئی ذرائع نے واضح کیا کہ جوڈیشل کمیشن کی تشکیل تک پی ٹی آئی مذاکرات کو آگے نہیں بڑھائے گی۔
