پی ٹی آئی چیئرمین بیرسٹر گوہر نے کہا ہے کہ کمیشن کے اعلان کے لیے 7 دن بہت ہوگئے، ہم دوبارہ غور کریں گے تاہم حکومت کمیشن کا اعلان کرے۔اسلام آباد میں پارلیمنٹ ہاؤس پہنچنے پر میڈیا سے گفتگو کرتے ہوئے ان کا کہنا تھا کہ پی ٹی آئی کے بانیوں نے مذاکرات کو روک دیا، ہم کھلے دل سے مذاکرات میں بیٹھے تھے۔انہوں نے کہا کہ ہمارے صرف 2 مطالبات تھے، کمیشن کے لیے 7 دن کافی تھے لیکن کوئی پیش رفت نہیں ہوئی۔پی ٹی آئی چیئرمین نے کہا کہ آج کی قانون سازی کی حمایت نہیں کریں گے، حکومت نے 8 قوانین اپنے ایجنڈے میں رکھے ہیں۔بیرسٹر گوہر نے کہا کہ 2021 کا ایک قانون ہے، 2023 کا پانچ، 2024 کا دو، 2021 کا قانون ابھی پاس نہیں ہو سکتا۔یاد رہے کہ گزشتہ روز پاکستان تحریک انصاف کے بانی اور سابق وزیراعظم نے حکومت سے جاری مذاکرات ختم کرنے کا اعلان کیا تھا۔اڈیالہ جیل کے باہر میڈیا سے گفتگو کرتے ہوئے بیرسٹر گوہر نے کہا کہ عمران خان نے پہلے حکومت کو 7 دن کا وقت دیا تھا۔ عدم تعاون پر مذاکرات ختم ہوئے۔انہوں نے کہا کہ حکومت نے ابھی تک کمیشن کا اعلان نہیں کیا، ہم چاہتے تھے کہ مذاکرات ہوں اور آگے بڑھیں۔
